Áýe qorǵanysy kúshteri byltyr 12 myń saǵattan astam oqý-jattyǵý ushýlaryn oryndaǵan
ASTANA. KAZINFORM – Jańa oqý jylynda Qarýly Kúshterdiń Áýe qorǵanysy kúshteriniń avıatsııalyq bólimderi oqý-jattyǵý ushýlaryn oryndaýǵa kiristi. 2025 jyly ekıpajdardyń jalpy ushý ýaqyty 12 myń saǵattan asty jáne bul kórsetkish jyl saıyn artyp keledi. Bul týraly Qorǵanys mınıstrligi habarlady.
Oqý-jattyǵý is-sharalary ushý ekıpajdary, ınjenerlik-tehnıkalyq quram jáne qamtamasyz etý bólimsheleriniń kásibı deńgeıin arttyrýǵa baǵyttalǵan. Baǵdarlamaǵa trenajerlarda sabaqtar ótkizý, qaýipsizdik talaptarynyń oryndalýyn tekserý, shtattan tys jaǵdaılarda áreket etý daǵdylaryn jetildirý, ushý quramynyń, ushýdy basqarý toptarynyń jáne avıatsııalyq tehnıkanyń daıyndyǵyn baqylaý kiredi.
Ushý barysynda ekıpajdar áýe shaıqasyn júrgizýdiń zamanaýı ádisterin meńgerip, jerústi jáne teńiz nysandaryna avıatsııalyq soqqylar jasaý tájirıbesin jetildiredi. Ásirese áýe barlaýyn júrgizý jáne radıoelektrondyq kúres quraldaryn qoldaný máselelerine basymdyq beriledi.
19132 áskerı bóliminiń shtab bastyǵy podpolkovnık Tımýr Sandybaevtyń aıtýynsha, bul is-sharalar joǵary jaýyngerlik daıyndyq deńgeıin saqtaý jáne jańa taktıkalyq tásilderdi ýaqtyly engizý úshin mańyzdy.
Ushý ekıpajdary desantty tasymaldaý jáne túsirý, shartty túrde jaralanǵandardy evakýatsııalaý, izdestirý-qutqarý operatsııalaryn qamtamasyz etý, sondaı-aq ártúrli júkterdi, onyń ishinde syrtqy aspaǵa bekitilgen júkterdi tasymaldaý mindetterin oryndaıdy. Ushý tapsyrmalarynyń oryndalýyn obektıvti baqylaý materıaldary negizinde nusqaýshylar qadaǵalaıdy. Ushýlar kúrdeli meteorologııalyq jaǵdaılarda, sonyń ishinde kóriný shekteýli, jaýyn-shashyndy jáne aýa temperatýrasynyń kúrt ózgerý jaǵdaılarynda ótedi.
Taýly aımaqtarda ushý qubylmaly jel aǵyndary men atmosferalyq qysymnyń ózgerýine baılanysty qıyndyqtar týǵyzady, al sý ústinde vızýaldy baǵdarlardyń bolmaýy ushý sapasyna áser etedi. Túngi ýaqytta ushqyshtar túngi kórý quraldaryn paıdalanady, jasyryn áreket elementterin pysyqtaý kezinde borttyq jaryq shamdary óshirilgen kúıde ushady. Áýe qorǵanysy kúshterinde avıatsııalyq bólimderdiń jaýyngerlik daıarlyǵyna bólinetin ýaqyt jyl saıyn turaqty túrde artyp keledi.
Buǵan deıin Prezıdent Qorǵanys mınıstrine áskerı jáne quqyqtyq tártipti kúsheıtý jóninde naqty mindetter júktegenin jazǵan edik.