Áýe qorǵanys kúshteriniń áskerı ınstıtýtynda merzimdi qyzmettiń sarbazdary ant berdi

Áskerı JOO-nyń kishi avıatsııa mamandaryn daıarlaý oqý ortalyǵynda 130-dan astam azamat Otannyń jáne eldiń aldynda adal qyzmet etýge ant berdi, dep habarlaıdy Kazinform Qorǵanys mınıstrligine silteme jasap. 

Áskerge jańa kelgender Aqtóbe, Jetisý, Qaraǵandy, Mańǵystaý, Túrkistan oblystary men Shymkent qalasynan shaqyrylǵandar. 

Saltanatty is-sharaǵa bilim ordasynyń basshylyǵy, Aqtóbe oblystyq máslıhatynyń ókilderi, ásker qataryn tolyqtyrǵandardyń týystary men jaqyndary qatysty.

Eki aılyq qyzmet barysynda sarbazdar jas jaýynger kýrsyn meńgerdi, jalpy áskerı jarǵylardy, qarýdyń taktıkalyq jáne tehnıkalyq sıpattamalaryn zerdeledi, saptyq, atys jáne dene shynyqtyrý daıyndyǵynan ótti. Olardy VIII shaqyrylǵan Aqtóbe oblystyq máslıhatynyń depýtaty Sergeı Vıshnıak, Áýe qorǵanysy kúshteri áskerı ınstıtýtynyń qolbasshylyǵy jáne jas jaýyngerlerdiń ata-analary quttyqtady. Áskerı ant bergen soń merzimdi qyzmettiń sarbazy Ulan Baıtelov sóz sóıledi. 

– Búgin men qolbasshylyqtyń, ata-anamnyń jáne dostarymnyń aldynda Otanyma adal bolýǵa ant berdim! Bul men úshin óte áserli boldy: eki aılyq qyzmetten keıin týystarymdy kórdim. Komandırlerimniń senimin aqtaýǵa jáne ata-anama sóz keltirmeýge tyrysamyn, – dedi ol. 

Atalmysh is-sharaǵa qatysýshylarǵa sarbazdar qarý-jaraqpen saptyq defıle kórsetti. Resmı bólimnen keıin Áýe qorǵanysy kúshteri áskerı ınstıtýtynyń bastyǵy polkovnık Tımýr Espaǵanbetov ata-analarmen áńgimelesip, merzimdi qyzmettegi sarbazdardyń turmys jaǵdaıymen tanystyryp, barlyq suraqqa jaýap berdi. Odan ózge jas jaýyngerler týystarymen kezdesýge alǵash ret qyzmetten bosatyldy. 

Áýe qorǵanysy kúshteriniń áskerı ınstıtýtyna shaqyrylǵan merzimdi qyzmet sarbazdary bes aı ishinde kishi avıatsııa mamandary laýazymyna daıarlyqtan ótetinin aıta ketelik. Oqýdan keıin olar odan ári qyzmet ótkerý úshin QR Qarýly kúshteriniń avıatsııalyq bólimderine jiberiledi.