Áýe kompanııalary ushýǵa tyıym salynǵan jolaýshylar tizimin qalaı jasaıdy

NUR-SULTAN. QazAqparat – Qazaqstanda áýe kompanııalary ushýǵa shekteý qoıylǵan jolaýshylardyń jeke tizimin jasaı alady. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev Májiliste aıtyp berdi, dep habarlaıdy QazAqparat tilshisi.

«Avıakompanııalarǵa áýe tasymaly shektelgen adamdardyń jeke tizilimin júrgizýge múmkindik beretin norma engiziledi. Alaıda azamattar mundaı tizimge tek ushaq bortyndaǵy quqyqbuzýshylyq úshin jáne olardy qylmystyq nemese ákimshilik jaýapkershilikke tartý nátıjesinde kinási dáleldengen jaǵdaıda ǵana engiziledi», - dedi Q. Óskenbaev Májilis otyrysynda.

Onyń aıtýynsha, halyqaralyq tájirıbeni nazarǵa ala otyryp, zań jobasynda «ádil mádenıet» (Just Culture) uǵymyn engizý kózdelgen.

Onyń negizgi qaǵıdaty – azamattyq avıatsııa salasyndaǵy qasaqana buzýshylyqtarǵa nemese nemquraıly minez-qulyqqa tózbeýshilik.

«Sondaı-aq zań jobasynda Jer kodeksine ony avıatsııalyq zańnamamen baılanystyrý úshin jáne ushý qaýipsizdigine qater tóndiretin qyzmetke ruqsat bermeý týraly ózgerister engizý kózdelgen. Áýeaılaqtan 15 km radıýsta ferma, mal soıý alańdaryn jáne basqa da obektilerdi salý, aýyl sharýashylyǵy qyzmetin júzege asyrý, eger olar qustardyń jappaı jınalýyna jaǵdaı jasamasa jáne ushý qaýipsizdigine qaýip tóndirmese, múmkin bolady», - dep túsindirdi Q. Óskenbaev.

Aıta keteıik, Májiliste «QR keıbir zańnamalyq aktilerine kólik máselesi boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

Zań jobasy Qazaqstan Respýblıkasynyń 4 kodeksi jáne 16 zańyna ózgertýler men tolyqtyrýlar engizýdi kózdeıdi.

Buǵan deıin mınıstr QR Zańdary men kodeksterine halyqtyń áleýmettik osal toptaryna qoǵamdyq kólikte júrýge jeńildik beretin normalar enetinin habarlaǵan edi.

Sondaı-aq, poıyz apatynyń sebep-saldaryn tasymaldaýshylar emes, mınıstrlik anyqtaıtyn bolady.