Áýe kompanııalary Kambodjadaǵy laınerdiń jolaýshylaryn qabyldaýdan bas tartyp otyr
PNOMPENЬ. QazAqparat – The Westerdam saltanatty krýız kemesiniń jolaýshylary men ekıpaj músheleri Kambodjada qıyn jaǵdaıda qaldy. Óıtkeni barlyq áýekompanııalary olardy bortqa qabyldaýdan bas tartty. Buǵan deıin Azııadaǵy bes port bul kemeni koronavırýstan qaýiptenip kirgizýden bas tartqan bolatyn, dep habarlaıdy QazAqparat Kyodo-ǵa silteme jasap.
Malaızııa jolaýshylardyń birinde vırýstyń bar-joǵyn anyqtaıtyn test oń nátıje kórsetkenin málimdegennen soń osyndaı jaǵdaı oryn aldy. Áıel adam Sıanýkvıl portynyń ońtústik-batysynda The Westerdam kemesinen túsip qalǵannan keıin juma kúni Malaızııaǵa ushyp ketti.
Japonııa, Taıvan, Fılıppın, Gýama jáne Taıland porttary kemeni kirgizýden bas tartqandyqtan Kambodja úkimeti laınerdi beısenbi kúni baılap qoıýǵa ruqsat etti.
Qazirgi kúni 2257 jolaýshy men ekıpaj músheleriniń 1000-ǵa jýyǵy Kambodjadan ketti. Olardyń 1255-i kemeden juma kúni tańerteń shyǵyp ketti.
Derekkózdiń málimeti boıynsha, Kambodja men quramynda AQSh bar múddeli taraptar, kommertsııalyq áýekompanııalaryna júginip, kemedegi jolaýshylardy elden áketýdi ótingen. Olar túrli baǵyttaǵy charterlik reısterdi jaldaýǵa tyrysqan, biraq sátsiz boldy.
Dúısenbi kúni eldiń premer-mınıstri Hýn Sen óziniń Facebook paraqshasynda jazba qaldyrdy.
«500 shetel týrısi tekseristen ótip, eshqaısysynda COVID-19 vırýsynyń belgileri anyqtalǵan joq. Qazirgi ýaqytta olar ýaqytsha Pnompendegi «Soha» qonaqúıine ornalastyryldy. Eger memleket azamattaryna qamqorlyq tanytpasa, Kambodja olarǵa degen jaýapkershilikti moınyna alady, sebebi olar bizdiń elimizde - qaýipsiz jerde», - dedi premer-mınıstr.
The Westerdam Sıanýkvılde toqtap, baılanǵan sátte Hýn Sen jolaýshylar men topty jyly qarsy alyp, olarǵa gúl men sharf syılady.
Bortynda 1455 týrıst pen 802 ekıpaj múshesi bolǵan keme 1 aqpan kúni Gonkongtan saparǵa attanǵan. Laıner Shyǵys Azııanyń birqatar elderine baryp, 14 kúndik saıahatty Iokogamada aıaqtaıdy dep josparlanǵan bolatyn.
Kemeni qabyldamas buryn eldiń densaýlyq saqtaý organdary aýyryp qalǵan 20 jolaýshyny tekserip, taldaý jasady. Testtiń nátıjeleri teris nátıje kórsetti.
Densaýlyq saqtaý qyzmetkerleriniń biriniń sózinshe, jolaýshylar qatarynda Malaızııada test oń nátıje kórsetken 83 jastaǵy áıel adam joq.
Úkimet ókilderiniń aıtýynsha, Kambodjada qalǵandardyń barlyǵy vırýstyń bar-joǵyn anyqtaıtyn taldaý tapsyrýy kerek.
