Áýe kompanııalarynyń tranzıttik jolaýshylar aǵyny ne sebepti ósti
ASTANA. KAZINFORM — «QazMunaıGazAero» avıaotyn baǵasyn básekege qabiletti deńgeıde saqtap otyr. Bul týraly búgin Úkimet otyrysynda Kólik mınıstri Nurlan Saýranbaev málim etti.
— Salany avıaotynmen qamtamasyz etý boıynsha keshendi sharalar iske asyrylyp keledi. Bul avıaotyn jetkizýdi arttyrýǵa jáne tranzıttik áleýetti kúsheıtýge baǵyttalǵan. Importtyq otyn baǵasynyń ósýine qaramastan, «QazMunaıGazAero» baǵasy básekege qabiletti deńgeıde saqtalyp otyr — tonnasyna 1200 AQSh dollary. Kompanııanyń naryqtaǵy úlesi 33%-ǵa deıin ósti. Áýe kompanııalaryna munaı óńdeý zaýyttarynan tikeleı otyn alýǵa múmkindik berildi. Importqa salynatyn tólemderden bosatyldy, — dedi Nurlan Saýranbaev.
Osy oraıda mınıstr bul is-qımyldardyń nátıjesinde tranzıttik reıster sany 16,3%-ǵa óskenin aıtty. Sonymen qatar, Air Astana áýe kompanııasynyń tranzıttik jolaýshylar aǵynynyń ósýi baıqalyp otyr.
Buǵan deıin qazaqstandyq áýe kompanııalaryna Taıaý Shyǵystaǵy jaǵdaı qalaı áser etip jatqanyn jazǵan edik.
2025 jyly qazaqstandyq áýe kompanııalar 15 mln jolaýshy tasymaldady. Bıylǵy alǵashqy 4 aıda jolaýshylar sany 4 mln-nan asty.
