Áýe kompanııalaryna sýbsıdııalar men bonýstar: Ózbekstan týrızmdi qoldaýdy kúsheıtpek
ASTANA. KAZINFORM – Ózbekstanda eldi qaýipsiz týrıstik baǵyt retinde ilgeriletý úshin aýqymdy naýqan bastalady, dep habarlaıdy Kazinform.
Bul týraly Ózbekstan prezıdenti Shavkat Mırzıeev Samarqan oblysynyń áleýmettik-ekonomıkalyq damýyna arnalǵan keńeste málimdedi. https://president.uz/ru/lists/view/9025
- Ózderińiz kórip otyrǵandaı, jahandyq turaqsyzdyqqa baılanysty jetkizý tizbegindegi úzilister, munaı baǵasynyń ósýi jáne kólik shyǵyndary azyq-túlik baǵasyna tabıǵı túrde áser etip otyr. Sonymen qatar shamamen 100 mln týrıst saparlaý úshin qaýipsiz jáne senimdi baǵyttardy izdeıdi. Mundaı jaǵdaıda azyq-túlik óndirisin arttyrý jáne týrızm men qyzmet kórsetý salasyndaǵy múmkindikterdi tolyq paıdalaný hokımderdiń basty maqsaty bolýy kerek, - dedi ol.
Sáýir aıynda týroperatorlarǵa qoldaý kórsetetin «Ózbekstandaǵy ashyq týrızm maýsymy» jarııalanady. Osylaısha, 1 sáýirden bastap úsh aı boıy olar tartylǵan árbir 1000 sheteldik týrıst úshin 5 myń AQSh dollaryna deıin sýbsıdııa beriledi. Qosylǵan qun salyǵynyń jartysy keshbek retinde qaıtarylady.
Áýe tasymalyn yntalandyrý úshin qarjylyq sharalar qarastyrylǵan: jańa baǵyttardy ashatyn áýe kompanııalary tartylǵan árbir sheteldik týrıst úshin 100 AQSh dollary tólenedi. Budan basqa, olarǵa áýejaı qyzmetterine 20% jeńildik usynylady.
Sondaı-aq áleýmettik jeliler arqyly belsendi túrde ilgeriletý josparlanǵan: 5 mln-nan astam jazylýshysy bar 50 sheteldik blogerge Ózbekstanǵa jeti kúndik tegin týr paketteri usynylady.
Osyǵan deıin Qazaqstan men Ózbekstan arasyndaǵy temirjol tasymaly eki ese artatyny habarlandy.
Sondaı-aq memleket basshysy Qasym-Jomart Toqaev týrıstik sala men balalar sportyn qoldaý týraly zańǵa qol qoıǵanyn habarladyq.
