Áýe kóligi jolaýshylarynyń quqyǵy qalaı saqtalyp júr
ASTANA. KAZINFORM – Áleýmettik jelini ashyp qalsań reısim keshikti, anaý bir áýe kompanııasy ushý ýaqytyn keıinge shegerdi degen syndy jıi estımiz. Osyndaı kezde kópshilik ózderiniń qandaı quqyqtary bar ekenin bile bermeıdi. Bul ózekti taqyrypqa «JibekJoly» arnasyndaǵy «BúginLive» baǵdarlamasynda QR KM AAK Halyqaralyq áýe qatynasyn retteý basqarmasynyń basshysy Ádilet Kóbenov jaýap berdi.
Aıtýynsha reıs avıakompanııanyń kesirinen keshikken jaǵdaıda aldymen jolaýshylarǵa habarlandyrý jiberýi kerek. Ol hatta mindetti túrde qansha ýaqytqa keshigetini, qandaı sebeppen keshikkeni týraly aqparat bolýy kerek. Sonymen qatar eki saǵattan keıin salqyn sý, al, 4 saǵattan keıin ystyq tamaq berýge mindetti.
– Eger kúndizgi ýaqytta segiz saǵat nemese túngi ýaqytta alty saǵat kútetin jaǵdaıda qonaqúıde turý qyzmetterin usynýy qajet. Sondaı-aq bul talaptar oryndalmaǵan jaǵdaıda áýe kompanııalary ákimshilik jaýapkershilikke tartylady, - deıdi Ádilet Kóbenov.
Ushaq keshigýiniń birneshe sebebi bar, - deıdi Halyqaralyq áýe qatynasyn retteý basqarmasynyń basshysy. Kóp jaǵdaıda aýa raıynyń kúrt ózgerýine baılanysty bolady. Bul rette jolaýshylardyń qaýipsizdigi basty nazarda bolýy kerek.
– Kez kelgen avıatsııalyq uıym jolaýshylarǵa qandaı da bir qaýip bar bolsa, ol olqylyqtar rettelgenge deıin qajetti sharalardy qabyldaýy kerek. Aýa raıynan basqa tehnıkalyq jaǵdaılar týyndaýy múmkin. Al, mundaı sátte avıakompanııa óziniń standarttaryna sáıkes, áreket etedi. Odan keıin baryp jolǵa shyǵady, - dedi ol óz sózinde.
Alaıda, keshikken ár saǵat úshin avıakompanııa bılet qunynyń 3 paıyzyn qaıtarýǵa mindetti. Al, ótemaqyny óndirý úshin, ony talap etýi kerek.
Saladaǵy taǵy bir salǵyrttyq – jolaýshylar chemodanynyń zaqymdanýy. Ondaı jaǵdaıda ne isteý kerek? Kimge júgingen jón? Bul suraqqa stýdııa qonaǵy bylaısha jaýap berdi.
– Halyqaralyq standarttarda bundaı jaǵdaı qarastyrylǵan. Árıne, eń aldymen jolaýshy chemodanyn ótkizgennen keıin, jaýapkershilik avıakompanııanyń moıynyda bolady. Eger jolaýshy chemodannyń zaqymdanǵanyn baıqaǵan bolsa, áýejaı qyzmetkerin shaqyryp, tıisti AKT jasaý kerek. Aldyn ala belgilengen normalarǵa baılanysty kináli tarap, shyǵyn kólemin eseptep, tóleýi shart. Bul rette, keıin jasaımyn dep, ýaqyt ótkizip almaǵan jón, - deıdi stýdııa meımany.
Biraq aıdyń-kúnniń amanynda aspannan qara bult tóndire berýge bolmaıdy. Jolaýshylar shaǵymdanbastan buryn, oryndalýy tıis talaptardy saqtaǵan durys. Mysaly:
1) Áýejaıǵa 40 mınýt buryn kelý;
2) Bıletinde kórsetilgen júk salmaǵynyń talaptan asyp ketpeýin qadaǵalaý;
3) Ushý ýaqytynda ekıpajdyń qoıǵan talaptaryn oryndaý;
4) Ár jolaýshy óz quqyqtaryn bilýge mindetti.
Aıtpaqshy, eger jolaýshy qandaıda bir zańbuzýshylyqqa jol berip, qoǵamdyq tynyshtyqty saqtamaǵan jaǵdaıda QR Ákimshilik quqyq buzýshylyq týraly kodeksiniń 434-baby boıynsha jaýapkershilikke tartylady.