Áýe elektr berý jelileriniń jańa aqaý anyqtaý júıesi pılottyq synaqtan sátti ótti
ASTANA. KAZINFORM – Ushqyshsyz ushý apparattary men jasandy ıntellekt tehnologııalaryn qoldanatyn áýe elektr berý jelileriniń (EBJ) jańa aqaý anyqtaý júıesi pılottyq synaqtan sátti ótti. Bul týraly Energetıka mınıstrligi habarlady.
Júıe «Janarmaı-energetıka keshenin basqarýdyń biryńǵaı memlekettik júıesi» (EnergyTech) aqparattyq platformasy aıasynda, JEK-ti tsıfrlyq transformatsııalaý kartasyna sáıkes engizilýde.
Tsıfrlyq servıs kelesi múmkindikterdi qamtamasyz etedi:
-
beınematerıaldar, fotosýretter, termobeıneleý jáne LiDAR-derekterdi taldaý arqyly EBJ-degi aqaýlardy avtomatty anyqtaý;
-
anyqtalǵan aqaýlardy tehnıkalyq núktelerge baılanystyra otyryp, nysandardy tsıfrlyq tirkeýden ótkizý;
-
tehnıkalyq jaǵdaıdy mashınalyq oqytý arqyly taldaý (anyqtaý dáldigi – 98%-ǵa deıin);
-
jasandy ıntellekt modelderin qaıta oqytýǵa arnalǵan etalondyq málimettermen salalyq vızýaldy aqparat data-ortalyǵyn qurý;
-
aqaýlardy tehnıkalyq qyzmet kórsetý jáne jóndeý júıelerine avtomatty túrde baǵyttaý.
Júıe EnergyTech platformasynyń arhıtektýrasyna ıntegratsııalanǵan. Energetıka mınıstrliginiń dereginshe, bul sheshim elektr energııasyn jetkizý jáne taratý jelilerindegi apattylyqty azaıtýǵa, proaktıvti dıagnostıka men tsıfrlyq tehnıkalyq qadaǵalaýǵa kóshýge múmkindik beredi.
Sonymen qatar júıeni engizý Energetıkalyq jáne kommýnaldyq sektorlardy jańǵyrtý jónindegi Ulttyq jobanyń maqsattaryna tolyq sáıkes keledi. Joba aıasynda salalyq negizgi úderisterdi keń kólemde tsıfrlandyrý jumystary júrgizilýde.
Aıta keteıik, buǵan deıin Qazaqstandaǵy alǵashqy atom elektr stantsııasy qandaı bolatyny habarlandy.