Áýe bazalaryn zymyranmen atqylaǵan: Pákistan «jaýap qaıtarýǵa» ýáde berdi

ASTANA. KAZINFORM — Pákistan Úndistandy zymyran shabýylyn jasady dep aıyptady. BBC agenttiginiń habarlaýynsha, Úndistannyń Áýe kúshteri shekara baǵytyna alty ballıstıkalyq zymyran ushyrǵan.

Reuters agenttiginiń málimetinshe, Pákistan armııasynyń resmı ókili Ahmed Sharıf Chaýdrıdiń aıtýynsha, zymyrandar Úndistannyń Adampýr qalasynan ushyrylǵan. Olar Pákistan aýmaǵyndaǵy birneshe áýe bazalardy, sonyń ishinde Islamabad qalasynan 10 shaqyrym jerdegi Ravalpındı qalasynda ornalasqan Nýr Han bazasyn nysanaǵa alǵan. Chaýdrıdiń málimdeýinshe, Pákistannyń Áýe kúshterine tıesili nysandarǵa zııan kelmegen.

Onyń aıtýynsha, alty zymyrannyń beseýi Úndistan aýmaǵynda, Pendjab shtatynda atyp túsirilgen.

— Úndistan endi bizdiń jaýabymyzdy kútýi tıis, — degen Chaýdrıdiń sózin Reuters agenttigi keltiredi.

Úndistan ázirge bul aıyptaýlarǵa qatysty resmı túsinikteme bergen joq.

Buǵan deıin Úndistan men Pákistan Kashmır aımaǵynda bir-birine taǵy da oq jaýdyrǵan bolatyn.

Pákistan qorǵanys mınıstri eki el arasyndaǵy shıelenistiń órshýi ıadrolyq soǵysqa ákelýi múmkin ekenin eskertken bolatyn.

Sondaı-aq, buǵan deıin Air Astana áýe kompanııasy Almaty -Delı baǵytyndaǵy reıstiń ushpaıtynyn habarlaǵan edi. Keıinnen Úndistanǵa qatynaıtyn birqatar ushaqtardyń kestesine ózgeris engen bolatyn.