Áýe apatynan qaza tapqan oraldyq ushqyshtyń otbasyna kómek kórsetilýde
ORAL. QazAqparat - 3 qazan kúni Almaty oblysynda apatqa ushyraǵan AN-28 ushaǵynda bolǵan ekinshi ushqysh Evgenıı Kýtafınniń otbasyna kómek kórsetilýde, dep habarlaıdy «QazAqparat» tilshisi.
Áýe sporty túrleri boıynsha oblystyq balalar-jasóspirimder sport mektebi qyzmetkerleri bir kúndik jalaqysyn marqumnyń otbasyna aýdarýdy uıǵardy.
Mektep dırektory Ergen Orynbasarovtyń aıtýynsha, Evgenıı parashıýt sportyna atalmysh mektep irge kótergen 2002 jyldan bastap keldi. Halyqaralyq jarystarǵa deıin baryp, sport sheberligine úmitker atandy. Bıyldyń ózinde Almaty qalasynda shildede parashıýt sportynan ótken QR chempıonatyna qatysty. Onda BQO quramasy jalpykomandalyq esepte tórtinshi satyǵa taban tirese, Evgenıı 54 sportshynyń ishinen 15-inshi oryndy ıelendi. Ómiri tosynnan qıylmaǵanda, alar asýy mol edi. Marqumnyń ákesi Vıtalıı Kýtafın qazir de parashıýt-desant daıyndyǵy jónindegi nusqaýshy retinde jumys jasaıdy.
Sonymen qatar oblystyq dene shynyqtyrý jáne sport basqarmasy, onyń quramyndaǵy barlyq sport mektepteri bir kúndik jalaqy esebinde óz kómekterin kórsetýde.
Oblystyq densaýlyq saqtaý basqarmasynan túsken málimetke qaraǵanda, bul mekeme ujymy bir kúndik eńbekaqylaryn áýe apatynan qaza tapqandar otbasyna aýdarmaqshy. Al Oraldaǵy barlyq emhanalar osyndaı járdemdi E.Kýtafınniń otbasyna bermekshi. Óıtkeni marqumnyń zaıyby №3 emhanada jumys jasaıdy.
Eske sala keteıik , keshe oblys ákimi Altaı Kólginov ushqyshtyń otbasyna qajetti kómek pen qoldaý kórsetýdi tapsyrǵan bolatyn.
