Áýe apatyna ushyraǵan dárigerler ólim aýzyndaǵy naýqas úshin kele jatqan
ShYMKENT. QazAqparat - Keshe Almaty mańynda áýe apatyna ushyraǵan dárigerler Túrkistandyq kelinshekti qaraýǵa kele jatqany belgili boldy. Bul týraly búgin Ońtústik Qazaqstan oblystyq klınıkalyq aýrýhananyń dárigerleri málimdedi, dep habarlaıdy QazAqparat tilshisi.
Klınıkalyq aýrýhananyń jansaqtaý bólimi meńgerýshisi Vıacheslav Tsaıdyń sózine qaraǵanda, 16 qyrkúıek kúni bosanǵan Túrkistandyq kelinshek emdeý mekemesine aýyr halde jetkizilgen. Ony emdeý sharalary qıynǵa soqqandyqtan Almatydan bilikti dárigerler shaqyrýǵa týra kelipti.
«Naýqas áıel bizge 2 qazan kúni óte aýyr jaǵdaıda tústi. 6-shy ret júkti bolǵan kelinshektiń baýyry aýyrǵan. Ol osy aýyrýyna baılanysty 2015 jyldan beri esepte turǵan. Bosanǵann keıin aýrýy asqynyp ketken. Bul jaǵdaı aýrý asqynnan keıin reaktsııa berý saldarynan bolǵan. Áıeldiń jaǵdaıy eki kúnnen beri aýyr kúıinde qalyp otyr. Bizge kelgende esin bilgenimen jaǵdaıy tym aýyr dep baǵalandy. Jasandy tynys apparatyna qosyp, demalýda. Biz mundaı kezde sanavıatsııa, ıaǵnı bilikti dárigerlerdi shaqyrtamyz.
Biz naýqasty emdeýge qaýqarymyz jetpeı jatqandyqtan ekinshi ret sanavıatsııa shaqyrttyq. Ol boıynsha dárigerler keletin kelmeıtini respýblıkalyq deńgeıde sheshiledi», - deıdi jansaqtaý bóliminiń meńgerýshisi.
Dárigerdiń sózinshe naýqas áıeldiń sábıi qazir Túrkistanda, dárigerlerdiń baqylaýynda.
Vıachaslav Tsaı sondaı-aq ushaq apatynda qaza tapqan dárigerlerdi burynnan tanıtynyn buǵan deıin de óńirge birneshe ret shaqyrylǵandyǵyn aıtty.
«Bul mamandar bizge buǵan deıin de jıi keletin. Bizge kómektesip, aqyl-keńesterin berip júrdi. Árıne, sondaı jandardyń ólimine bizdiń shaqyrtýymyz sebep bolǵany ókinishti. Ol kisilerge qaı kezde bolmasyn habarlasyp, aqyl-keńes surasań joq demeı, bárin túsindirip aıtyp beretin. Kez-kelgen ýaqytta bizden kómegin aıaǵan emes»,- deıdi Vıacheslav Tsaı.
Eske salaıyq, 3 qazan kúni Almaty-Shymkent baǵytynda sanıtarlyq avıareısin oryndaǵan «AN-28» ushaǵy saǵat 18:47-de Almatydan 28 shaqyrym qashyqtyqta rodardan joǵalyp ketti. Sosyn saǵat 19.15-te ushaq Almaty oblysy Іle aýdanynyń Mejdýrechınsk aýyly mańynda apatqa ushyrap, órtengeni habarlandy. Bortta bolǵan 5 adam qaza boldy.
