Aýdıtten keıin SQO-da birqatar laýazymdy qyzmetker jaýapkershilikke tartyldy
ASTANA. KAZINFORM — Joǵary aýdıtorlyq palata júrgizgen aýdıtten keıin Soltústik Qazaqstan oblysynyń birqatar laýazymdy adamy jaýapkershilikke tartyldy.
Soltústik Qazaqstan oblysy ákimi apparatynyń, sondaı-aq jekelegen qalalar men aýdandar ákimderi apparattarynyń laýazymdy adamdary memlekettik aýdıt nátıjeleri boıynsha tártiptik jaýaptylyqqa tartyldy.
Joǵary aýdıtorlyq palata bıyl qazan aıynda Soltústik Qazaqstan oblysyna bólingen bıýdjet qarajaty men memleket aktıvteriniń qanshalyqty tıimdi paıdalanylyp jatqanyn tekserdi. Nátıjesinde zańnama, bıýdjet normalary jáne ishki reglamentteýshi qujattardy oryndaýda zań buzý anyqtaldy.
Osyǵan baılanysty óńir ákimine, sondaı-aq Petropavl jáne Sergeevka qalalarynyń, Aıyrtaý, Ýálıhanov, Aqjar jáne Taıynsha aýdandarynyń basshylyǵyna buzýshylyqtarǵa jol bergen laýazymdy adamdardy jaýaptylyqqa tartý tapsyryldy.
Nátıjesinde myna qyzmetkerler ártúrli tártiptik jaýaptylyqqa tartyldy:
Aıyrtaý aýdanynyń ákimi;
Petropavl qalasy ákiminiń orynbasary;
Sergeevka qalasy ákiminiń orynbasary;
oblys ákimdiginiń Qurylys, sáýlet jáne qala qurylysy basqarmasy basshysynyń orynbasary;
oblys ákimdigi Densaýlyq saqtaý basqarmasy basshysynyń orynbasary;
oblys ákimdigi Jolaýshylar kóligi jáne avtomobıl joldary basqarmasy basshysynyń orynbasary;
Petropavl qalasy ákimdiginiń Qurylys, sáýlet jáne qala qurylysy bóliminiń sektor meńgerýshisi;
Taıynsha aýdany ákimdiginiń Sáýlet, qurylys, TKSh, jolaýshylar kóligi jáne avtomobıl joldary bóliminiń basshysy;
Aıyrtaý jáne Ýalıhanov aýdandary ákimdikteriniń Sáýlet, qurylys, TKSh, jolaýshylar kóligi jáne avtomobıl joldary bóliminiń sektor meńgerýshileri;
Aqjar aýdany ákimdiginiń TKSh, jolaýshylar kóligi, avtomobıl joldary jáne turǵyn úı ınspektsııasy bólimi basshysynyń m. a.
Sonymen qatar Joǵary aýdıtorlyq palatanyń tapsyrmasy boıynsha SQO-da memlekettik aýdıt barysynda anyqtalǵan zań buzýdy joıý jónindegi is-sharalar jospary ázirlendi. Josparda oblystyq mańyzy bar avtomobıl joldaryn pasporttaý da kózdelgen.
Aýdıt qorytyndylary boıynsha berilgen basqa da tapsyrmalardyń oryndalýy baqylaýda bolady.
Aıta ketelik aýdıt nátıjesi: óńirlik ÁKK-de 33,6 mlrd teńge bıýdjet qarjysy negizsiz jumsalǵany anyqtalǵan edi.