Aýdıtorlyq tekserý 198 mlrd teńgeniń qarjylyq buzýshylyqtaryn anyqtady - Smaıylov

NUR-SULTAN. QazAqparat - Aýdıtorlyq tekserý 198 mlrd teńgeniń qarjylyq buzýshylyqtaryn anyqtady. Bul týraly búgin Úkimet otyrysynda 10 aıdaǵy memlekettik bıýdjettiń atqarylýy jaıynda baıandaǵan QR Premer-Mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Esep berý kezeńinde bıýdjet qarajatyn ıgerý barysynda týyndaıtyn buzýshylyqtardyń aldyn alý maqsatynda 2 779 aýdıtorlyq is-shara ótkizildi. Aýdıtorlyq is-sharalarmen 694 mlrd teńge qamtyldy. 194 mlrd teńgege qarjylyq buzýshylyqtar anyqtaldy», - dedi birinshi vıtse-premer.

Onyń dereginshe, tekserý nátıjeleri boıynsha 179 mlrd teńge somaǵa taýarlardy jetkizý, jumystardy oryndaý, qyzmetterdi kórsetý, esepke alý jáne bıýdjetke óteý arqyly buzýshylyqtar joıyldy. Júrgizilgen kameraldyq baqylaý nátıjesinde 743 mlrd teńge somaǵa memlekettik satyp alý boıynsha buzýshylyqtardyń aldyn alý júrgizildi.

«Jyl sońyna deıin az ýaqyt qaldy. Sondyqtan, osy ýaqyttyń basym mindeti - birinshiden bıýdjet qarajatyn tıimdi jáne tolyq ıgerý. Ol úshin barlyq qajetti qujattardy ýaqtyly ázirlep qabyldaý qajet jáne 2019 jylǵa arnalǵan naqtylanǵan respýblıkalyq bıýdjetti iske asyrý úshin barlyq kerekti bıýdjettik rásimderdi júrgizip úlgerý kerek. Ekinshiden, ortalyq jáne jergilikti organdar qarasha aıynda 2020-2022 jyldarǵa arnalǵan respýblıkalyq bıýdjetti iske asyrý úshin memlekettik satyp alýdyń aldyn ala josparlaryn ázirleýi tıis. Úshinshiden, qarashadan bastap ákimshiler barlyq deńgeıdegi bıýdjet qarajaty esebinen 2020 jylǵa arnalǵan memlekettik satyp alý boıynsha konkýrstardy habarlandyrýdy bastaýy qajet», - dedi Á.Smaıylov.