Aýdıtorlyq palata talaptaryn oryndamaǵan 18 sheneýnik jazaǵa tartyldy
ASTANA. KAZINFORM – Joǵary aýdıtorlyq palatasynyń nusqamalaryn oryndamaǵany nemese tıisinshe oryndamaǵany úshin 18 jaýapty laýazymdy adam jáne 4 memlekettik organ ákimshilik jaýaptylyqqa tartyldy.
— Joǵary aýdıtorlyq palatanyń nusqamasy — júrgizilgen memlekettik aýdıt qorytyndylary boıynsha naqty buzýshylyqtar nemese kemshilikter anyqtalǵan jaǵdaıda beriletin resmı memlekettik qujat.
Qujatta neni túzetý kerek, kim jaýapty jáne qandaı merzimde shara qabyldaý kerek ekeni naqty kórsetiledi. Bul — yqpaldy mehanızm. Ol jiberilgen kemshilikter úshin jazalaýǵa ǵana emes, tártipti qalpyna keltirýge jáne respýblıka deńgeıindegi mańyzdy salalarda qaıtalanatyn buzýshylyqtardyń aldyn alýǵa arnalǵan. Berilgen nusqamalardyń barlyq tarmaǵy Joǵary aýdıtorlyq palata mamandarynyń turaqty baqylaýynda, — delingen habarlamada.
Máselen, 1 qazandaǵy jaǵdaı boıynsha Joǵary aýdıtorlyq palatanyń nusqamalaryn oryndamaǵany nemese tıisinshe oryndamaǵany úshin:
Ulytaý oblysy ákiminiń orynbasary;
Túrkistan qalasy ákiminiń orynbasary;
Ulytaý oblysy Jańaarqa aýdany ákiminiń orynbasary;
Medıtsınalyq jáne farmatsevtıkalyq baqylaý komıteti tóraǵasynyń m. a. ákimshilik jaýaptylyqqa tartyldy.
Sondaı-aq «Semeı» ÁKK» AQ-nyń jaýapty qyzmetkerleri, birqatar oblystyń basqarma basshylary, birqatar qalanyń bólim meńgerýshileri, jekelegen mınıstrlikterdiń departament dırektorlaryna jáne t. b. ákimshilik jaza qoldanyldy. Sonymen qatar 4 zańdy tulǵa jaýapkershilikke tartyldy.
— Qarjy mınıstrliginiń Memlekettik kirister komıteti, Sý resýrstary jáne ırrıgatsııa mınıstrliginiń Sý resýrstaryn retteý, qorǵaý jáne paıdalaný komıteti, Kólik mınıstrliginiń Avtomobıl joldary komıteti, Qyzylorda oblysy ákiminiń apparaty. Atalǵan kezeńde Joǵary aýdıtorlyq palata nusqamalarynyń 4 tarmaǵyn oryndamaýǵa baılanysty Ulytaý oblysynyń Jezqazǵan, Sátbaev qalalary men Ulytaý aýdanynyń ákimdikterine qatysty sotqa talap qoıý bastamasy kóterildi. Máseleler qaralý satysynda, — delingen Joǵary aýdıtorlyq palata habarlamasynda.
Aıta ketelik memlekettik aýdıtten keıin sport salasynda baqylaý men esepke alý kúsheıtiletini týraly jazǵan edik.