Aýdıtorlar Mańǵystaý oblysynda 5,5 mlrd teńgeniń qarjylyq zańbuzýshylyqtaryn anyqtady
ASTANA. KAZINFORM - Aýdıtorlar Mańǵystaý jáne Túrkistan oblystarynda qaryz qarajatyn paıdalanýda jol berilgen buzýshylyqtardy anyqtady, dep habarlaıdy QR Joǵary aýdıtorlyq palatasynyń baspasóz qyzmeti.
Baspasóz qyzmetiniń málimetterine qaraǵanda, tekserý komıssııalary Mańǵystaý jáne Túrkistan oblystarynda bıýdjettik kredıtter men halyqaralyq qarjy uıymdarynyń qaryz qarajatyn tıimsiz jáne maqsatsyz paıdalaný faktilerin anyqtady.
Óńirlerde memlekettik boryshty jáne kvazımemlekettik sektordyń jekelegen sýbektileriniń boryshyn basqarý aýdıtteri Joǵary aýdıtorlyq palatanyń tapsyrmasy boıynsha júrgizildi.
Qaryz qarajaty tartylǵan ınfraqurylymdyq obektilerdi, turǵyn úılerdi salý jáne jańǵyrtýda nátıje joq. Keı jaǵdaıda tartylǵan qaryzdar qosymsha kiris alý úshin depozıtterge salynǵan, bul qarajatty maqsatqa saı paıdalanbaý bolyp tabylady.
Aýdıt nátıjeleri boıynsha osy óńirlerde qaryz qarajatyn paıdalaný tıimdiligine, sondaı-aq kredıttik mindettemelerdi ýaqytyly óteýge jetkilikti baqylaý jasalmaǵany atap ótildi.
Aýdıtorlar Mańǵystaý oblysynda 5,5 mlrd teńgege qarjylyq buzýshylyqtar, 869 mln teńgege syrtqy qaryzdy tıimsiz josparlaý jáne paıdalaný, 6,7 mlrd teńgege bıýdjettik kredıtti tıimsiz paıdalaný faktilerin anyqtady. Óńirde 2 laýazymdy tulǵa ákimshilik jaýapqa tartylyp, olarǵa 3,3 mln teńge aıyppul salyndy.
Túrkistan oblysynda aýdıt qorytyndysy boıynsha 10,5 mln teńgege qarjylyq buzýshylyqtar, 4,8 mlrd teńgege bıýdjet qarajaty men aktıvterdi tıimsiz paıdalaný anyqtaldy.
