Aýdıtorııa sýyq: Qyzylorda ýnıversıtetiniń ákimshiligi stýdentter shaǵymyna jaýap berdi
QYZYLORDA. KAZINFORM — Qorqyt ata atyndaǵy Qyzylorda ýnıversıtetiniń 5-oqý ǵımaratynda jylýdyń bolmaýyna baılanysty bilim alýshylar áleýmettik jelide shaǵymdandy.
Stýdentterdiń aıtýynsha, aýdıtorııalar salqyn bolǵandyqtan sabaqqa qatysý qıyndaǵan.
— Qorqyt ata ýnıversıteti, 5-korpýs, jylý joq. Syrtta sýyq, aýdıtorııanyń ishi odan beter sýyq. Sabaqqa bilim alýǵa kelip, aýyryp qaıtyp jatyrmyz. Qystyń ortasynda emes, qazirden tońyp bittik. Jylýdy qashan qosady eken? — delingen jazbada.
Ýnıversıtet ákimshiligi búgin jylý iske qosylǵanyn málimdedi.
— Jylýdyń ýaqytsha toqtatylýy bıyl oqý ǵımaratynyń janynan jańa ǵımarattyń boı kóterýine baılanysty jylý qazandyǵynyń qýatyn arttyrý jáne onyń aýqymyn keńeıtý jumystarymen baılanysty boldy. Atalǵan jumystyń barlyǵy ýnıversıtet ujymy men bilim alýshylarǵa qolaıly ári jaıly jaǵdaı jasaý maqsatynda júzege asyrylyp jatyr. Jylý máselesi ýnıversıtet basshylyǵynyń kúndelikti qadaǵalaýynda, — delingen resmı habarlamada.
Búǵan deıin biz jylý maýsymy bastalǵaly Pavlodar jurtynan myńnan astam shaǵym túskenin jazǵanbyz.
