Aýdıtor bolý ońaı emes: 48 úmitkerdiń 9-y óte almady

ASTANA. KAZINFORM — Bıylǵy jyldyń I toqsany boıynsha memlekettik aýdıtorlardy sertıfıkattaý qorytyndysy shyqty. Bul týraly palatanyń baspasóz qyzmeti málim etti.

Bul kezeńde tıisti deńgeıdegi Memlekettik aýdıtor biliktiligin ıelenýge úmitker adamdardy sertıfıkattaý jónindegi ulttyq komıssııanyń úsh otyrysy ótti. Jalpy 48 adam qatysty.

Eske sala keteıik, sertıfıkattaý eki kezeńnen turady.

• Birinshi kezeńde kandıdattar Zertteýler, taldaý jáne tıimdilikti baǵalaý ortalyǵynda ótkiziletin testileý formatyndaǵy biliktilik emtıhany arqyly óz bilimderin rastaıdy. Emtıhan býhgalterlik esep, memlekettik mekemeler men kvazımemlekettik sektor uıymdary úshin qarjylyq eseptilikti daıyndaý, sáıkestik aýdıti, tıimdilik aýdıti jáne basqa da pánderdi qamtıdy.
• Ekinshi kezeńde qatysýshylar Ulttyq komıssııada áńgimelesýden ótedi. Áńgimelesý barysynda olardyń kásibı daıyndyǵy, quzyretter deńgeıi, jeke qasıetteri, sondaı-aq memlekettik aýdıtorlar úshin mindetti kásibı ádep qaǵıdattaryna beıildiligi baǵalanady.

Sertıfıkattaý qorytyndysy boıynsha 39 kandıdatqa memlekettik aýdıtor biliktiligi berildi.

Sonymen qatar 9 úmitkerge memlekettik aýdıtor biliktiligin berýden bas tartyldy.

Eske sala keteıik, buǵan deıin bıyl Joǵary aýdıtorlyq palatasynda óńirlik tekserý komıssııalary músheleriniń laýazymdaryna kandıdattardy irikteý jónindegi komıssııanyń úsh otyrysy ótkenin jazdyq.