Aýdıt – zamanaýı sot ınfraqurylymyn damytýdyń mańyzdy quraly – Naıl Ahmetzakırov

ASTANA. KAZINFORM – Sot ákimshiliginiń basshysy Naıl Ahmetzakırov Aqmola, Qostanaı, Jetisý oblystary men Áskerı sottyń qurylymdaryna júrgizilgen aýdıt qorytyndylaryn saralap, sot ınfraqurylymyna jumsalatyn shyǵystardy ońtaılandyrý máselesine arnalǵan BBK-keńeste birqatar naqty tapsyrmalar berdi.

Keńes jumysyna Sot ákimshiliginiń qurylymdyq jáne aýmaqtyq bólimsheleriniń basshylary qatysty.

Ahmetzakırov Memleket basshysynyń únemshil ekonomıkany qatań saqtaý jónindegi tapsyrmasyn eske salyp, bıýdjet qarajatynyń tıimdi ári maqsatty jumsalýyn qamtamasyz etýdiń mańyzdylyǵyn atap ótti. Onyń aıtýynsha, únemdelgen qarjy ınfraqurylymdy jańǵyrtý men sýdıalardyń eńbek jaǵdaıyn jaqsartýǵa baǵyttalýy tıis.

2024 jyly jalpy aýmaǵy 46,4 myń sharshy metr bolatyn 8 sot ǵımaraty paıdalanýǵa berildi. Pavlodar, Shyǵys Qazaqstan, Atyraý, Batys Qazaqstan jáne Abaı oblystarynda jańa nysandar salyndy. Ǵ.Músirepov atyndaǵy aýdandyq sot (SQO), Túrkistan jáne Abaı oblystyq sottary respýblıkalyq bıýdjet esebinen boı kóterdi. Borodýlıha aýdandyq sotynyń ǵımaraty jeke ınvestor esebinen turǵyzyldy.

Shymkent qalasynda jergilikti atqarýshy organ qarjysy esebinen ǵımarattardy ońtaılandyrý jobasy iske asty. Nátıjesinde azamattyq sottar biryńǵaı ǵımaratqa shoǵyrlanyp, ákimshilik jáne qarjylyq shyǵyndar aıtarlyqtaı qysqartyldy.

2025 jylǵa josparlanǵan 5 joba – Aqtóbe, Batys Qazaqstan jáne Atyraý oblystarynda jergilikti bıýdjet esebinen júzege asyrylady. Sonymen qatar, taǵy 11 sot ǵımaratynyń jobalyq-smetalyq qujattamasy ázirlenýde.

Únemdelgen qarajat esebinen 89 sot nysanyna jóndeý jumystary júrgizildi. Sonymen qatar, 1 myńnan astam zamanaýı uıymdastyrý tehnıkasy satyp alynyp, sottardyń kompıýterlik parkin jańartý jumysy bastaldy.

Sottardyń ınjenerlik-tehnıkalyq ınfraqurylymy jetildirilip, aqparattyq qaýipsizdik deńgeıi arttyryldy. Jasandy ıntellekt elementteri engizilgen ABJ-nyń jańa býyny synaqtan ótkizilý ústinde. Azamattyq ister boıynsha «Alqalyq ARD» jobasy pılottyq rejımde iske qosylady.
«Tórelik 2.0» júıesi, «Sot praktıkasy» taldaý modýli jáne onlaın sot protsesterin ótkizýge arnalǵan portal syndy birqatar ınnovatsııalyq ІT-sheshimder engizilý satysynda.

Naıl Ahmetzakırov aýdıtti bıýdjet qarajatynyń ashyqtyǵy men tıimdiligin qamtamasyz etetin negizgi qural retinde atap ótti. Ol Sot ákimshiligi departamentteriniń basshylaryna qarjy tártibin saqtap, sybaılas jemqorlyqqa qarsy zańnamanyń buzylýyna jol bermeý baǵytynda baqylaýdy kúsheıtýdi tapsyrdy.

Aıta keteıik, Joǵarǵy sot «Eýrazııalyq saýda júıesi» taýar bırjasy jeńip alǵan tenderdi zańsyz dep tanyǵan bolatyn.

Sonymen qatar, Senat Joǵarǵy sot sýdıasyn qyzmetinen bosatqany týraly habarlaǵanbyz.