Aýdıt nátıjesi: Almaty oblysynda 5 mlrd teńge tıimsiz josparlanǵan

QONAEV. KAZINFORM — Almaty oblysynda 6 aıda 93 mlrd teńgeden astam qarjyǵa aýdıt júrgizildi. Bul týraly Tekserý komıssııasynyń músheleri Qýanysh Esenamanov pen Erik Baqytov aıtty.

Almaty oblysy boıynsha Tekserý komıssııasy 2025 jyldyń alǵashqy jartyjyldyǵynda 63 obektini teksergen. Aýdıt nátıjesinde jalpy 8,4 mlrd teńgeden astam somaǵa buzýshylyqtar anyqtalǵan. Bul — aýdıtpen qamtylǵan qarajattyń 9,1 paıyzy.

— Negizgi buzýshylyqtar qarjylyq esep júrgizý men bıýdjet qarajatyn paıdalaný tártibin saqtamaýǵa qatysty bolyp otyr. Qarjylyq buzýshylyqtardyń jalpy somasy — 3,2 mlrd teńge. Onyń ishinde 78,9 mln teńge bıýdjetke ótelýge tıis, qalǵan bóligi býhgalterlik esepte qalpyna keltirilýi qajet. Bul — esep júrgizýdegi salaqtyq pen baqylaýdyń jetkiliksizdigin kórsetedi, — dedi Qýanysh Esenamanov.

Sonymen qatar aýdıt barysynda 308,7 mln teńge kóleminde bıýdjet qarajaty men memlekettik aktıvterdiń tıimsiz paıdalanylǵany anyqtaldy. Al 4,8 mlrd teńge tıimsiz josparlanǵan.

— Memlekettik múlikti tıimdi basqarý qaǵıdattary saqtalmaǵan. Avtokólik satyp alý, teńgerimge tirkelmegen obektilerge shyǵyn jumsaý jáne oryndalmaǵan jumystar úshin merdigerlerge tólem jasaý faktileri bar. Bul bıýdjettik tártiptiń álsizdigin ańǵartady, — dedi Erik Baqytov.

Tekserý komıssııasyryń málimetinshe, memlekettik aýdıt obektilerine 49 mindetti tapsyrma jáne 2 usynym jiberilgen. Anyqtalǵan buzýshylyqtar boıynsha 41 laýazymdy tulǵa tártiptik, al 140 tulǵa ákimshilik jaýapkershilikke tartylǵan. Bıýdjetke 14,4 mln teńge aıyppul óndirildi.

Eske salaıyq, bıyl 20 trln teńgeni qamtıtyn 12 memlekettik aýdıt júrgizilgen.