Memlekettik eńbek ınspektorlary 2 myńnan astam jumyskerdiń jalaqasyn tóletip berdi
ASTANA. KAZINFORM – Jyl basynan beri memlekettik eńbek ınspektorlary 23 myńnan astam jumyskerdiń quqyǵyn qorǵady. Bul týraly Eńbek jáne halyqty áleýmettik qorǵaý mınıstrligi málim etti.
— 1 shildedegi jaǵdaı boıynsha memlekettik eńbek ınspektorlary respýblıkanyń 92 kásiporny 2,1 myńnan astam jumyskerge 882 mln teńgege jalaqy boıynsha bereshek ekenin anyqtady. Sonymen birge túrli uıymdarda júrgizilgen tekserýler barysynda eńbek quqyǵy buzylýynyń 3,6 myńǵa jýyq faktisi anyqtaldy, — delingen habarlamada.
Jalaqy boıynsha bereshegi jáne eńbek quqyǵynyń buzylýy anyqtalǵan kásiporyndardyń basshylaryna oryndaýǵa mindetti 1 951 uıǵarym berildi jáne 233 mln teńgeden astam somaǵa aıyppul salyndy.
— Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 2 myńnan astam jumyskerdiń quqyqtary qorǵaldy. Olarǵa 755,4 mln teńge tólendi, — dep habarlady vedomstvodan.
Budan basqa, eńbek zańnamasynyń saqtalýyna memlekettik baqylaýdy qamtamasyz etý máseleleri QR Eńbek jáne halyqty áleýmettik qorǵaý mınıstrliginiń erekshe baqylaýynda.
2025 jylǵy 1 shildedegi derekter boıynsha memlekettik eńbek ınspektorlary 2 941 tekserý júrgizdi, onyń barysynda 3 608 buzýshylyq anyqtaldy, onyń ishinde: eńbek salasynda — 2 973; eńbek qaýipsizdigi jáne eńbekti qorǵaý boıynsha — 616; halyqty jumyspen qamtý boıynsha — 19.
Qabyldanǵan sharalardyń nátıjesinde 21 myń jumyskerdiń eńbek quqyǵy qorǵaldy.
Eske sala keteıik, buǵan deıin jyl basynan beri memlekettik eńbek ınspektorlary 43,6 myńnan astam jumyskerdiń quqyǵyn qorǵaǵanyn jazǵan edik.