Aýdıt: Bıýdjettiń 231 mlrd teńgesine qarjylyq buzýshylyqtar anyqtaldy

Jyl basynan beri 1,4 trln teńge bıýdjet qarajaty aýdıtpen qamtyldy jáne 231 mlrd teńgege qarjylyq buzýshylyqtar anyqtaldy. Bul týraly QR Qarjy mınıstri Erulan Jamaýbaev tolyqqandy aıtyp berdi, dep habarlaıdy Kazinform.

«Bıylǵy 11 aıda 12 trln teńgege 507 myńnan asa memlekettik satyp alý rásimderi kameralyq baqylaýmen qamtyldy. Tekserý nátıjesinde 72 108 rásim boıynsha buzýshylyqtar anyqtaldy, onyń ishinde memlekettik aýdıt obektileri kemshilikterdi joıý týraly habarlamalardyń 93%-in oryndady», - dedi Erulan Jamaýbaev Úkimettiń búgingi otyrysynda.

Qarjy mınıstriniń aıtýynsha, 2 055 aýdıtorlyq is-shara ótkizildi jáne 1,4 trln teńge bıýdjet qarajaty aýdıtpen qamtyldy.

«Shamamen 231 mlrd teńge somasyna qarjylyq buzýshylyqtar anyqtaldy. 175 mlrd teńgege buzýshylyqtar taýarlardy jetkizý, qyzmetterdi kórsetý men jumystardy oryndaý, bıýdjetke óteý jáne esepke alý jolymen joıyldy. Aýdıt obektileri qyzmetin jetildirý jáne tıimdiligin arttyrý úshin 2 081 usynym berildi», - dedi spıker.

Buǵan deıin spıker qaı mınıstrlikter men oblystar bıýdjet qarajatyn ıgere almaǵanyn aıtqan edi.

Sondaı-aq, memlekettik bıýdjetke 18,2 trln teńge túskenin, jyl basynan beri jergilikti bıýdjetterge túsken kirister jospardan asyra oryndalǵanyn aıtqan edi.