Aýdıt: «Báıterek» ǵarysh júıesine qarastyrylǵan 81 mlrd teńgeniń tórtten biri ǵana ıgerilgen

ASTANA. KAZINFORM — Joǵary aýdıtorlyq palata múshesi Nurlan Nurjanov Májilistegi otyrysta «Báıterek» ǵarysh júıesine bólingen qarajattyń jospardy oryndaýǵa jetkiliksiz bolyp jatqanyn baıandady.

— «Báıterek» ǵarysh júıesine qatysty aıtsaq, biz 5 jyl saraptama jasadyq. Jalpy bul jerdegi úrdis bekitilgen bıýdjette qarastyrylǵan qarajat bıýdjetti naqtylaǵan kezderde azaıtýǵa jıi ushyraıdy. Mysaly, 5 jylda 81 mlrd teńge qarastyrylǵanymen, sonyń 40 mlrd teńgesi ǵana qaldyrylǵan. Endi osy somanyń tek 21 mlrd teńgesi ǵana oryndalǵan. Sonda 81 mlrd teńgeniń tórtten biri ǵana ıgerilgen. Osylaısha 2028 jylǵa mejelengen jospardyń oryndalatynyna kúmánimiz bar, — dedi Nurlan Nurjanov.

Sondaı-aq, «Samuryq-Qazyna» aktsıonerlik qorynda júrip jatqan aýdıttiń aıaqtalatyn ýaqytyn atady.

— «Samuryq-Qazyna» qoryna júrgizip jatqan aýdıt shilde nemese tamyz aıynda aıaqtalady. Sol kezde kemshilikterge jol bergen laýazymdy tulǵalardyń jaýapkershiligi týraly usynymdardy tıisti organdarǵa beremiz, — dedi palata múshesi.

Sondaı-aq, ol Úkimet byltyr bıýdjettiń shyǵys bóligin 13 ret ózgertkenin atap ótti.