Audi, Siemens jáne Bosch jasandy ıntellekt naryǵynda kóshbasshy bolýdy kózdeıdi

ASTANA. KAZINFORM — Eýropalyq alyptar Audi, Siemens jáne Bosch óndiristi transformatsııalaý úshin jasandy ıntellektini belsendi túrde engizip jatyr, dep habarlaıdy DW.

Audi-de ol dánekerleý tigisteriniń fotosýretterin naqty ýaqyt rejıminde taldap, aqaýlardy anyqtap, jumysshylarǵa olardy jedel túzetýge kómektesip keledi. Jaqyn arada robot dánekerleý kezinde paıda bolatyn «shashyrandylardy» da avtomatty túrde joıa alatyn bolady, bul óndiris jyldamdyǵy men sapasyn aıtarlyqtaı arttyrady.

Siemens tehnıkalyq syzbalarmen, robot derekterimen jáne óndiristik jeliler týraly málimettermen jumys isteı alatyn biregeı ónerkásiptik bazalyq jasandy ıntellekt úlgisin jasap jatyr. Bul model barlyq aqparatty bir júıege biriktirip, protsesterdi jedeldetýge, aqaýlardy boljaýǵa, logıstıkany ońtaılandyrýǵa jáne jańa ónimderdi tezirek shyǵarýǵa múmkindik beredi. Kompanııa qazirdiń ózinde ónerkásiptik derektermen almasý úshin klıentterdi tartyp, Eýropada jasandy ıntellektini jappaı engizýge negiz qalap otyr.

Bosch óndiristegi máselelerdi derbes anyqtap, tez sheshim qabyldaıtyn avtonomdy júıelerge basymdyq berip otyr. Mysaly, jabdyq buzylǵan jaǵdaıda, jasandy ıntellekt basqa zaýyttardyń tájirıbesin, nusqaýlyqtardy taldap, jedel sheshim usynady. Bul tehnologııa shyǵyndardy azaıtyp qana qoımaı, servısti jańa deńgeıge kóteredi.

Sonymen birge, Eýropa AQSh jáne Qytaımen qatań básekelestik jaǵdaıynda. AQSh-ta OpenAI men Google sııaqty kompanııalar iri tildik modelder jasaýda ústemdikke ıe, Qytaı da bul salada qýat pen ınvestıtsııa kólemin arttyryp jatyr. Al Eýropada basty artyqshylyq – ónerkásiptegi tájirıbe men biregeı derekter, dep jazady Spiegel jýrnaly. Sarapshylardyń pikirinshe, ónerkásiptegi jasandy ıntellektini úılestirip damytý Eýropanyń jahandyq tehnologııalyq jarystaǵy basty básekelik artyqshylyǵyna aınalýy múmkin.

Aıta ketelik Memleket basshysy jasandy ıntellektini damytý máseleleri jóninde keńes ótkizgen edi.