Audi kompanııasynyń taza paıdasy 87 paıyzǵa tómendedi
ASTANA. KAZINFORM — Nemistiń Audi avtokólik óndirýshisi 2026 jyldyń úshinshi toqsanynda taza paıdasy byltyrǵy jyldyń sáıkes kezeńimen salystyrǵanda 87 paıyzǵa azaıǵanyn habarlady. Sonymen qatar kompanııa jyldyq qarjylyq boljamyn qaıta qarady. Bul týraly Kazinform agenttigi Bild basylymyna silteme jasap habarlady.
Basylymnyń málimetinshe, Volkswagen kontsernine kiretin Audi kompanııasynyń shilde-qyrkúıek aılaryndaǵy taza paıdasy nebári 95 mln eýro (shamamen 48 mlrd teńge) bolǵan.
Qarjylyq kórsetkishterdiń nasharlaýyna baılanysty kompanııa 2026 jylǵa arnalǵan boljamyn bıyl ekinshi ret ózgertti. Endi Audi jyldyq tabysy buryn boljanǵan 58-63 mlrd eýronyń (29,34-31,87 trln teńge) ornyna 55-59 mlrd eýro (27,82-29,84 trln teńge) bolady dep esepteıdi. Al operatsııalyq tabystylyq kórsetkishi 5-7 paıyzdan 3-5 paıyzǵa deıin tómendetildi.
Paıdanyń azaıýyna Qytaıda avtokólikke suranystyń tómendeýi, básekeniń kúsheıýi jáne AQSh engizgen ımporttyq baj salyǵy negizgi sebep bolǵan. Úshinshi toqsanda Audi kólikteriniń álemdik jetkizilimi byltyrǵy jyldyń sáıkes kezeńimen salystyrǵanda shamamen 20 paıyz qysqardy.
AQSh-tyń saýda shekteýleri de kompanııanyń qarjylyq jaǵdaıyna kesirin tıgizgen. Audi ázirshe AQSh aýmaǵynda kólik óndirmeıtindikten, Vashıngton engizgen baj salyǵy kompanııaǵa shamamen 1,2 mlrd eýroǵa (607 mlrd teńge) túsken.
Sonymen qatar avtokólik óndirýshi AQSh-ta quny shamamen 4 mlrd dollar (1,81 trln teńge) bolatyn zaýyt salý múmkindigin qarastyryp jatyr. Kásiporyn jyl saıyn 200 myńǵa deıin jol talǵamaıtyn kólik shyǵaryp, shamamen 4 500 jumys ornyn ashýy múmkin. Alaıda jobaǵa qatysty túpkilikti sheshim áli qabyldanǵan joq.
AQSh-ta óndiristi keńeıtý jospary Germanııada synǵa ushyrady. Atap aıtqanda, Audi basshysy Gernot Dellner AQSh prezıdenti Donald Tramp qatysqan is-sharaǵa barǵany úshin synǵa qalǵan.
Sonymen birge kompanııa shyǵyndardy azaıtyp, jumys tıimdiligin arttyrý baǵdarlamasy aıasynda 2029 jylǵa deıin Germanııada 7 500 jumys ornyn qysqartýdy josparlap otyr.
Eske salaıyq, buǵan deıin Audi kompanııasynyń Belgııadaǵy zaýyty jabylyp, myńdaǵan adam jumyssyz qalǵanyn habarlaǵan edik.
