Audi kompanııasynyń Belgııadaǵy zaýyty jabylyp, myńdaǵan adam jumyssyz qaldy
ASTANA. KAZINFORM - Kompanııadaǵy shyǵyndardyń joǵarylaýyna baılanysty óndiris Qytaı men Meksıkaǵa kóshiriledi. Qazirgi ýaqytta ónerkásip alańyn ózgertý máselesi qarastyrylyp jatyr, dep habarlady Euronews.
77 jyldyq tarıh aıaqtaldy. Belgııa astanasyndaǵy Audi zaýyty jabylyp, 3 000 jumysshy sońǵy aýysymda esep berdi.
2024 jyldyń ortasyna taman óndiris shyǵynǵa ushyrap, jumysshylar sany qysqartyldy. Qazan aıynyń sońynda birde-bir ınvestor nemese satyp alýshy tabylmaǵan soń zaýytty 2025 jyldyń aqpan aıynan bastap birjola jabý týraly sheshim qabyldandy.
— Bul jerde 15 jyl jumys istedim. Zaýyt ómirimniń mańyzdy bir bóligine aınalyp edi. Jaısyz habardy estip, birdeńemdi joǵaltqandaı kúı keship otyrmyn, - deıdi jumysshylardyń biri.
Zaýyt 2006 jyly jabylý aldynda turdy, biraq ol Audi kiretin Volkswagen kontsernin qaıta qurýdyń arqasynda jabylýdan aman qalǵan. Biraq jıyrma jylǵa jýyq ýaqyttan keıin nemis avtomobıl óndirýshisi óndiristiń Qytaı men Meksıkaǵa kóshetinin jarııalady. Óıtkeni paıda marjasy «jetkiliksiz» jáne belgııalyq jumys kúshiniń quny tym joǵary.
Buǵan deıin Belgııadaǵy jalpyulttyq ereýil kezinde 30 myńǵa jýyq adam kóshege shyqqanyn habarlaǵan edik.