Aýdaryspaqtan Qazaqstan chempıondary anyqtaldy
NUR-SULTAN. QazAqparat - Almaty qalasynda ulttyq sport túrlerinen ótip jatqan Jasóspirimder arasyndaǵy el birinshiginde aýdaryspaqtan jeńimpazdar men júldegerler anyqtaldy, dep habarlaıdy QazAqparat.
QR Ulttyq sport qaýymdastyǵynan málim etkendeı, týrnır «Baıserke» ıppodromynda ótýde. Aýdaryspaqtan 2001-2003 jyly dúnıege kelgen jasóspirimder arasynda ótken QR birinshiliginde 40, 50, 60, 70 jáne 70 keliden joǵary salmaqtardaǵy sheberler synǵa tústi.
Nátıjesinde, 40 keli salmaqta Aqtóbe oblysynyń týmasy Meıirman Áripov chempıon atandy. Ekinshi oryndy túrkistandyq Azamat Jumabek ıelense, úzdik úshinshi oryndy Jambyl oblysynan kelgen Aıbek Japarov jeńip aldy.
50 keli salmaqta bas júldeni túrkistandyq Bekzat Qambar qanjyǵasyna baılady. Ekinshi orynǵa aqtóbelik Abaı Tursynbaev, úshinshi orynǵa jetisýlyq Suńqar Táýkebaev ıe boldy.
60 keli salmaqta batysqazaqstandyq Mıras Berikbaevqa teń keler eshkim bolmady. Ekinshi oryndy Almaty oblysynyń sportshysy Edil Erbolatuly, úshinshi oryndy aqtóbelik Álisher Sálimjanov jeńip aldy.
70 keli salmaqta chempıondyq ataqqa túrkistandyq Rasýl Quraıysh ıe bolsa, kúmis júldeni qaraǵandylyq Tólegen Madııar qanjyǵasyna baılady. Qola medal jambyldyq Aǵadil Ahatbekke buıyrdy.
70 keliden joǵary salmaqta synǵa túsken aýdaryspaqshylar arasynda Aqtóbe oblysynyń týmasy Aslan Esenǵarın bas júldeni jeńip alsa, jambyldyq Aslanbek Súndetov ekinshi, Almaty oblysynan kelgen Aıdar Dildábek úshtikti qorytyndylady.
Aıta keteıik, keshe kókpardan toptyq kezeń máresine jetti. Chempıonat baǵdarlamasyna sáıkes, 29 maýsym kúni teńge ilý men jamby atý básekeleri ótse, kókpardyń fınaldyq oıyndary men jarystyń jabylý saltanatty 30 maýsymǵa josparlanǵan.
