Aýdaryspaqtan Azııa chempıonatyn da ótkizýge bolady - Qazaqstannyń ulttyq sport túrleri qaýymdastyǵy
ASTANA. 28 qarasha. QazAqparat - Búginde Astanada aýdaryspaqtan Azııa chempıonatyn da ótkizýge bolady. Búgin Astanada ótken baspasóz máslıhatynda Qazaqstannyń ulttyq sport túrleri qaýymdastyǵynyń birinshi vıtse-prezıdenti Bekbolat Tileýhan osylaı aıtty.
«Endi, qazir «Samuryq-Qazyna» qory úlken báıgeler tikkennen keıin biz qazaq kúresine degen qyzyǵýshylyqtyń artqanyn baıqap jatyrmyz. Myna bir qyzyqty qarańyz, bıylǵy oqý jylynyń basynda eldiń bári óz balalaryn qazaq kúresine jazdy. Qazaq kúresine bapker jetpeı qaldy. Onyń barlyǵy nasıhattyń arqasynda júzege asyp otyr. Sol sııaqty aýdaryspaqtan da arnaıy básekelerdi ótkizýge bolady. Oǵan kóp shyǵyndalýdyń qajeti joq. «Samuryq-Qazyna» júldege qomaqty bir qarjy qoıyp jiberse, aýdaryspaqty da qazaq kúresi sııaqty alyp ketýge múmkindik bar. Ony Astanadaǵy tsırk ǵımaratynda ótkizýge bolady. Kelesi jyly sondaı bir josparymyz bar. Aýdaryspaqtan ashyq Azııa chempıonatyn ótkizip jiberemiz degen oıymyz da joq emes», - deıdi B.Tileýhan.
