Aýdaryspaqtan Azııa chempıonaty: Bas júlde - Altyn beldik jáne avtokólik
ASTANA. QazAqparat - Aýdaryspaqtan Azııa chempıonatynda absolıýtti chempıonnyń «Altyn belbeýi» sarapqa salynyp, bas júldege temir tulpar tigiledi.
Bul týraly búgin Aýdaryspaqtan 1-shi ashyq Azııa chempıonatynyń uıymdastyrylýyna oraı ótken brıfıngte QR Ulttyq sport túrleri qaýymdastyǵynyń prezıdenti Bekbolat Tileýhan málim etti.
«Bul tuńǵysh ret tarıhta ótkeli turǵan jarys. Buryn-sońdy aýdaryspaqtan mundaı halyqaralyq dárejedegi shara bolǵan emes. Bul jarysqa álemniń 12 eli óz ótinishterin bildirip, onyń 11 eli keldi», - dedi ol.
Onyń atap ótýinshe, aýdaryspaq at ústindegi kóshpeli babalarymyzdyń soǵys óneriniń búgingi kúnge jetken aıryqsha salasy, dástúri dep aıtýǵa bolady.
«Osy baıraqty básekege 11 memlekettiń qurysh qoldy, taqymy tastaı bolǵan palýandary qatysýǵa nıet bildirip otyr. Bul jobaǵa Qytaı, Reseı, Túrkııa, Vengrııa, Aýǵanstan, Qyrǵyzstan, Tájikstan, Ózbekstan, Ázerbaıjan, Mońǵolııa jáne Qazaqstannyń saıdyń tasyndaı iriktelgen sporshylary arasynan Azııa qurlyǵyndaǵy aýdaryspaqtan eń myqty palýan anyqtalady. Chempıonat 70, 90 kelige deıin jáne 90 keliden joǵary salmaq dárejeleri boıynsha ótedi. Jarystyń sońynda jeńiske jetken palýandar absolıýtti chempıon ataǵyn sarapqa salatyn bolady. Dúbirli dodanyń bas júldesi «Altyn beldik» jáne avtokólik», - dedi B.Tileýhan.
Aıta keteıik, aýdaryspaqtan Azııa chempıonaty erteń elordadaǵy «Qazanat» ıppodromynda bastalady.
