Aýdaryspaqtan alǵashqy Azııa chempıonaty elordada ótedi
ASTANA. QazAqparat - Astana qalasynda 15 maýsym kúni álem tarıhynda tuńǵysh ret Aýdaryspaqtan І-shi ashyq Azııa chempıonaty uıymdastyrylady.
Bul týraly QR Ulttyq sport túrleri qaýymdastyǵynan habarlady.
Osyǵan baılanysty, 14 maýsymda Qazmedıa ortalyǵynda (QMO) Azııa chempıonatynyń baspasóz máslıhaty men palýandardyń tanystyrylymy ótedi.
Baıraqty básekege 11 memlekettiń qurysh qoldy, taqymy tastaı palýandary qatysýǵa nıet bildirip otyr. Bul joba Qytaı, Reseı, Túrkııa, Vengrııa, Aýǵanstan, Qyrǵyzstan, Tájikstan, Ózbekstan, Ázerbaıjan, Mońǵolııa jáne Qazaqstannyń saıdyń tasyndaı iriktelgen sportshylary arasynan Azııa qurlyǵyndaǵy aýdaryspaqtan eń myqty palýandy anyqtaıdy.
Chempıonat 70 kelige deıin, 90 kelige deıin jáne 90 keliden joǵary salmaq dárejeleri boıynsha ótedi. Jarys sońynda júlde alǵan palýandar absolıýtti chempıon ataǵyn sarapqa salatyn bolady.
Aýdaryspaq - salt attylardyń birin-biri er ústinen aýdaryp alýǵa tyrysatyn qazaqtyń ulttyq sport túriniń biri. At ústinde kúrese bilý úshin sportshydan kúshtilik, eptilik, tózimdilik pen batyldyq talap etiledi.
