Aýdaryspaq qaısarlyq pen kúshti qajet etedi – qyzylordalyq sportshy
QYZYLORDA. QazAqparat - Qyzylorda oblysynda aýdaryspaq sportynan aldyńǵy lekten kórinip júrgen jastar az emes. Solardyń biri – Jasulan Jálimbetov Jańaqorǵan aýdany, Qyrkeńse aýylynda turady, dep habarlaıdy QazAqparat tilshisi.
On jasynda atqa mingen aýyl balasy áýelgi ýaqytta kókparǵa qatysqan bolatyn. Keıinnen qumarlyǵy aýdaryspaqqa aýa tústi. Búginde eresekter arasyndaǵy aýdaryspaqqa qatysyp júrgen ol el chempıonatynda birneshe márte júldegerler qatarynan kórindi.
«Jylqynyń aqyldy janýar ekenin bala kezimnen sezinip óstim. Kishkentaıymnan asaý úıretýge qumar boldym. Beride aýdaryspaqqa qyzyǵýshylyǵym oıandy. Bapkerim Qanat Abylbekovten kóptegen erejesin úırendim. Sońǵy on jyldan beri túrli jarystarǵa qatysyp júrmin», - dedi ol.
Elimizde aýdaryspaq eresekter, jastar jáne jasóspirimder arasynda ótkiziledi. Saıyskerler salmaq boıynsha tańdap alynady. Basty talap – sportshyda qaısar minez ben kúsh bolýy tıis.
«Saıystyń bul túrinde árkimniń óz ádisi bar. Máselen, belden, bilekten jáne aıaqtan tartý ádisterin qoldana otyryp, qarsylasyńdy attan aýdaryp túsirýge nazar aýdarylady. Saıys barysynda atpen sekirip urýǵa, jalynynan ustaýǵa tyıym salynǵan. Qoldy, saýsaqty qaıyrýǵa jáne betten urýǵa bolmaıdy. Eki qoldap erdiń basynan ustaýǵa da ruqsat joq. Osy erejelerdi esten shyǵarmaı, attyń ústinde kúsh synasý – erlikpen teń. Oıyn kezinde at toqtamaı aınalyp, ıkemińe yńǵaı tanytýy tıis. Beriletin ýaqyt – 5 mınýt. Eger sol ýaqytta eshteńe sheshilmese, onda beldestirý bolady. Sondyqtan sportshy úshin árbir mınýt mańyzdy», – deıdi Jasulan.
Ótken jyldarda Aqtóbede ótken festıvalda Jasulan úshinshi oryndy jeńip aldy. Sol jyly oǵan mektep tarapynan at berildi. Qazir shabandoz «Qaratalmen» birge daıyndalyp júr. Al Shymkent qalasynda ótken saıysta ekinshi oryn ıelendi. Aldaǵy saıysqa daıyndalý úshin jaqyn kúnderi Taraz qalasyna jol júrmek.
Jańaqorǵan aýdanyndaǵy №7 balalar men jasóspirimder sport mektebi jastardy ulttyq sportqa baýlýǵa nazar aýdaryp keledi. Qazir aýdanda aýdaryspaqpen aınalysatyn 200-den astam sportshy bar.
