Aýdarylǵan oqýlyqtar bıyl bilim baǵdarlamasyna engizilsin - Elbasy

ASTANA. QazAqparat -«Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda bıyl 30 kitap qazaq tilinde aýdarylady. Bul týraly búgin atalǵan joba aıasynda jaryq kórgen kitaptardyń tanystyrylymynda Elbasy Nursultan Nazarbaev aıtty, dep habarlaıdy QazAqparat.

«100 jańa oqýlyq» jobasy boıynsha Úkimet Ulttyq aýdarma bıýrosyna birqatar naqty tapsyrma berýi qajet. Birinshiden 2018 jylǵa bekitiletin 30 kitapty sapaly aýdaryp, basyp shyǵarý kerek. Aýdarmashylarǵa jumys tolyp jatyr. Oǵan qarjyny ýaqtyly bólinip, odan keıingi jyldarda qolǵa alynatyn oqýlyqtar der kezinde bekitilip saraptalýy kerek», - dedi Elbasy.

Ekinshiden, Memleket basshysy bul oqýlyqtardy bilim júıesine tıimdi engizý eń mańyzdy mindet bolatyndyǵyn aıtty.

«Jastar olardy birden-birden oqı bastaýy qajet. Aldaǵy oqý jylynan bastap osy  oqýlyqtarmen oqytylatyn pánder bilim berý baǵdarlamasyna engizilsin. Úshinshiden,  qoldanysqa engen termınderdi jınaqtap, gýmanıtarlyq-ekonomıkalyq leksıkanyń túsindirme sózdigin shyǵarýdy júkteımin», - dedi QR Prezıdenti.

Elbasy tórtinshiden, oqýlyqtardy kádimgi kitap túrinde shyǵarýmen qatar tsıfrlyq negizde, onlaın bilim berýdi damytýǵa tıis ekendigimizdi basa aıtty.

«Qazaqstannyń ashyq ýnıversıteti  jan-jaqty qoldaýǵa ıe bolýy kerek. Oqýlyqtardyń negizinde daıyndalatyn ashyq lektsııalar vıdeotekasynyń sapasyna basa mán berý. Besinshi, «100 jańa oqýlyq» jobasy ǵylymı aýdarma mektebin damytý úshin asa mańyzdy. Bul áli de bolashaqta bizge kerek bolady. Sondyqtan aýdarmalar aıasyndaǵy tájirıbe, bilik, kásibı daǵdylardy júıelep, damyta túsý qajet. Osynyń bárin sapaly iske asyrýǵa Bilim jáne ǵylym mınıstrligi  jaýapty, al jalpy jumysty úılestirýdi Úkimetke tapsyramyn», - dedi Nursultan Nazarbaev.