Aýdarma arqyly qabyldanǵan zańnyń júzege asýy óte qıyn - Nurtóre Júsip
NUR-SULTAN. QazAqparat – Parlament Senatynda zań shyǵarýshylyq protsesti jetildirý taqyrybyna arnalǵan parlamenttik tyńdaýda depýtattar saladaǵy kemshilikterdi atady, dep habarlaıdy QazAqparat tilshisi.
«Parlament depýtattarynyń basty mindeti – elge de, el azamattaryna da paıdaly, sapaly zań aktilerin daıarlaý, jetildirý jáne qabyldaý. Al olardyń tıimdiligin anyqtaýdyń basty krıterııi – qoǵamdyq monıtorıng júrgizý. Biz qabyldaǵan zańdardy qoǵam, BAQ, áleýmettik jeli, jalpy halyq qalaı qabyldady? Jetistigi nede? Kemshiligi qandaı? Onyń bárin «Ádilet» quqyqtyq júıesi, Parlamentarızm Instıtýty arqyly qadaǵalap, qoǵamdyq pikirdi udaıy basshylyqqa alyp otyrýymyz kerek» - dedi Muhtar Qul-Muhammed.
Senator Murat Baqtııaruly Parlamentke ratıfıkatsııalaýǵa kelip jatqan zań jobalarynyń, olardyń qosymshalaryndaǵy halyqaralyq qujattardyń memlekettik tildegi nusqalaryndaǵy sapasyzdyqty atap ótti. Mınıstrlikter men vedomstvolar qyzmetkerleri pysyqtalmaǵan ári tekserilmegen materıldardy jiberedi.
«Osy ýaqyt ishinde memlekettik organdar mamandary termındik qoldanystar men stıldi meńgeretindeı boldy. Biraq memorgandar qyzmetkerleriniń qazaq tilindegi halyqaralyq qujattardy Parlamentke qatesiz jiberýge shamasy ári yntasy joq sııaqty. Tipti, keıbir jaǵdaılarda qujat jobalarynyń qazaq tilindegi mátini men orys tilindegi mátini mazmuny jaǵyn bir-birine sáıkes kelmeı jatady. Memlekettik zańdar aldymen sol eldiń óz tilinde daıyndalyp, sodan keıin ǵana qajet bolsa, orys tiline aýdarylýy tıisti», - dedi M. Baqtııaruly.
Óz kezeginde Senat depýtaty Nurtóre Júsip senatorlardyń eskertýimen tolyqtaı kelisetinin jetkizdi.
«Elimizdegi kez kelgen zańnyń sapasy birinshi kezekte durys bolýy kerek. Qabyldanǵan zań jumys isteýi tıis, ol úshin zańnyń tili jumys isteýi kerek. Aýdarma arqyly qabyldanǵan zańnyń júzege asýy, ómirde qoldanylýy óte qıyn. Sondyqtan kez kelgen zańdy qabyldaý kezinde memlekettik tildi qurmetteýdi ótiner edim», - dedi N. Júsip.
