Aýdaryspaqtan 3 qazaqstandyq sportshy altyn medal aldy
ASTANA. KAZINFORM – 5-shi Dúnıejúzilik kóshpendiler oıyndarynda aqtyq synǵa joldama alǵan úsh qazaqstandyq sportshy da óz salmaqtarynda altyn júlde jeńip aldy. Olar – Ermek Quralbaı, Almat Látipbek jáne Daryn Ótkelbaı.
Aýdaryspaq oıyndaryna 9 elden 64 oıynshy qatysty. Onyń qatarynda Qazaqstan, Qyrǵyzstan, Ózbekstan, Mońǵolııa, Reseı, Qytaı, AQSh, Túrkııa jáne Majarstan bar.
60 keli salmaqta synǵa túsken Qazaqstan ulttyq quramasynyń sportshysy Ermek Quralbaı altyn medalǵa ıe boldy. Ol fınalda Qyrǵyzstan sportshysyn jeńdi.
«Jaqsy daıyndyqpen keldim. Fınaldaǵy qarsylasym – byltyr at ústindegi kúresten 60 kelide chempıon bolǵan qyrǵyz palýany. El namysyn qorǵap, birinshi oryn alamyz dep úmittengen edim. Senimdi aqtaǵanyma qýanyshtymyn», – dedi Ermek Quralbaı.
Aýdaryspaqtan 70 keli salmaqta synǵa túsken Almat Látipbek te altyn medal jeńip aldy.
Sondaı-aq, aýdaryspaqtan 80 keli salmaqta synǵa túsken Daryn Ótkelbaı altyn medalǵa ıe boldy.
Aıta keteıik, erteń 10 qyrkúıekte Esimhan Rahmatillá, Syrym Іzbasarov jáne Birjan Qosalıev synǵa túsedi.
