Aýdandyq jáne aýyldyq deńgeılerde ákimshilik bólýdiń jańa standarttary ázirlenedi
«Jergilikti deńgeıde máselelerdi sheshý úshin Tujyrymdama (2025 jylǵa deıingi jergilikti ózin ózi basqarýdy damytý tujyrymdamasy) jobasynda jergilikti bıýdjet shyǵystaryn utymdy bólýdi arttyrýǵa jáne kommýnaldyq menshik nysandaryn tıimdi paıdalanýǵa baǵyttalǵan is-sharalar kózdelgen. Birinshi - ońaılatylǵan tártippen tirkelmegen kommýnaldyq menshik nysandaryn túgendeý jáne esepke qoıý. Ekinshi - aýyldyq okrýg ákimine Keńespen birlesip jergilikti ózin-ózi basqarýdyń kommýnaldyq menshigine berýge jatatyn múlik túrlerin aıqyndaý quqyǵyn berý. Úshinshi, aýyldyq eldi mekenderdegi áleýmettik obektilerdi jobalaýǵa arnalǵan shyǵystardy azaıtý úshin úlgilik jobalaý-smetalyq qujattama ázirlenedi», - dedi departament dırektory.
Onyń atap ótýinshe, azamattardyń memlekettik qyzmetter men áleýmettik ıgilikterge teń qol jetkizýin qamtamasyz etý maqsatynda eldiń ákimshilik-aýmaqtyq qurylysyn jetildirý jónindegi is-sharalar kózdeledi. Sonymen qatar jekelegen iri aýyldardyń jáne shaǵyn qalalardyń mártebesi qaıta qaralady.
«Osyǵan baılanysty, aýdandyq jáne aýyldyq deńgeılerde ákimshilik bólýdiń jańa standarttary ázirlenedi. Qalyptastyrylǵan standarttardyń negizinde ekonomıkalyq, áleýmettik jáne demografııalyq erekshelikterdi eskere otyryp, eldi mekenderdi biriktirý jáne irilendirý, qaıta baǵyndyrý jáne olardyń mártebesin ózgertý jóninde keshendi jumys júrgiziledi. Eldi mekenderdiń shekaralary men mártebesine qatysty barlyq ózgerister mindetti túrde jergilikti qoǵamdastyqpen kelisiletin bolady. Aıtylǵan is-sharalardy sapaly iske asyrý 2025 jylǵa qaraı ýaqyt syn-qaterlerine jaýap beretin jáne «halyq únine qulaq asatyn memleket« tujyrymdamasyna sáıkes azamattarymyzdyń múddelerin tolyqqandy iske asyrýǵa baǵyttalǵan jergilikti ózin-ózi basqarýdyń jańa modelin qalyptastyrýǵa múmkindik beredi», - dedi Anar Baıtúkenova.
