Aýdandyq aýrýhanadaǵy órtti polıtseı men dáriger sóndirdi - SQO
PETROPAVL. QazAqparat – Soltústik Qazaqstan oblysynda aýdandyq aýrýhananyń balalar bólimshesinde órt shyǵyp, oqıǵa ornynda bolǵan tártip saqshysy men dáriger der kezinde jalyndy aýyzdyqtady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqys oqıǵa 28 sáýir kúni saǵat 23.00 shamasynda Ǵ.Músirepov atyndaǵy aýdandyq aýrýhanada bolǵan. Sol kúni balalar bólimshesine jaraqat alǵan qyz jetkizilgen. Mundaı jaǵdaıda ıývenaldy polıtseıler zorlyq-zombylyqqa tekserip, mindetti túrde materıal jınaıdy. Polıtsııa kapıtany Qanat Merǵalımov osy maqsatpen aýrýhanaǵa kelgen.
«Qabyldaý bólimshesine medbıbi júgirip kirip, balalar bólimshesinde órt shyqqanyn aıtty. Men jedel oqıǵa ornyna bardym,artymnan qyzdy qaraýǵashaqyrtýmen kelgen rentgenolog Andreı Sıdorenko da jetti. Qalyń tútin emdeý bólmesinen shyǵyp jatty. Eki medbıbi jalyndy basa almaı jatyr eken. Dáriger adamdardy qaýipsiz jerge shyǵarýǵa kiristi de, men órt sóndirgishpen tilsiz jaýdy aýyzdyqtaýǵa kiristim», - deıdi Qanat Merǵalımov.
Órt elektr quralynyń qysqa tuıyqtalýynan shyqqan eken.
Saldarynan tartpaly tóbe balqyp, eden men jıhazǵa aǵa bastaǵan. Polıtsııa
qyzmetkeri men oǵan qaıta kómekke kelgen dáriger ekeýlep, órtti sóndire aldy.
«Balalar bólimshesinde 17 bala men sábılerimen jatqan 4 ana bar edi. Eń aldymen olardy tynyshtandyryp, qaýipsiz jerge shyǵarý qajet boldy. Dáriger Sıdorenko batyldyq kórsetti. Shaqyrtý túskennen soń 7-8 mınýttan keıin órt sóndirýshiler jetti. Ol kezde biz jalyndy sóndirip, syrqattar men qyzmetkerlerdi kórshi bólimshege kóshirip úlgergen edik», - deıdi
polıtseı.
Aýdandyq polıtsııa bóliminiń bastyǵy Marat Áljanovtyń aıtýynsha, polıtsııa kapıtany Merǵalımov 18 jyldyq eńbek ótili bar tájirıbeli maman.
Іshki ister organdarynda qyzmetti patrýldik polıtsııadan bastaǵan ol buǵan deıin de túrli jaǵdaılardy bastan ótkergen, janyp jatqan kólikti sóndirgen kezderi de bolǵan.
