Aýdandyq sot sýdıalaryn taǵaıyndaýdyń jańa tásili engizildi
ASTANA. KAZINFORM – Qazaqstanda sot júıesin jańartý aıasynda aýdandyq sottarǵa sýdıa taǵaıyndaýdyń jańa tásili engizildi. Bul týraly Ortalyq kommýnıkatsııalar qyzmetinde QR Joǵary Sot Keńesiniń múshesi Saltanat Júnispekova málimdedi.
– Buryn bos oryndar kóbine jumys istep júrgen sýdıalardy aýystyrý arqyly toltyrylatyn. Bul kadr tapshylyǵyn azaıtpaıtyn. Qazir jańa kandıdattarǵa, sonyń ishinde Sot tóreligi akademııasynyń túlekterine basymdyq berilip otyr, – dedi Saltanat Júnispekova.
Onyń aıtýynsha, jańa tásil kadr quramyn jańartýǵa múmkindik bergen.
– Sonyń nátıjesinde aýdandyq sottarǵa taǵaıyndalǵandar arasynda jumys istep júrgen sýdıalardyń úlesi 31%-dan 14%-ǵa deıin azaıdy. Bul jańa sýdıalardyń kóbirek taǵaıyndala bastaǵanyn kórsetedi, – dedi ol.
Sonymen qatar kásibı daıyndyqtan ótken sýdıalardyń úlesi artqan.
– 2024 jyly Akademııa túlekteri 537 adam nemese 28,7% bolsa, 2025 jyldyń sońynda bul kórsetkish 583 sýdıaǵa, ıaǵnı 31%-ǵa jetti. Olardyń 65-i sot tóraǵasy qyzmetin atqaryp otyr, – dedi Saltanat Júnispekova.
Іrikteý úderisi ashyq bola tústi. Qatysýshylar tizimi jarııalanyp, 3500-den astam pikir tústi. Konkýrs nátıjeleri onlaın kórsetilip, barlyq kezeńniń qorytyndysy ashyq jarııalanyp otyr.
– Sonymen qatar zań salasy ókilderine túsindirý jumystary júrgizildi. 2025 jyly ótken onlaın semınarlarǵa 13 myńnan astam adam qatysty. Sonyń nátıjesinde bir bos orynǵa orta eseppen 12 úmitkerden keldi, – dedi ol.
Aıta keteıik, buǵan deıin 2025 jylǵy 1 shildeden bastap Astanada kassatsııalyq sottar jumysyn bastaǵany habarlanǵan bolatyn.
