Aýdandyq aýrýhanalardy jabdyqtaý týraly mınıstrliktiń esep-qısaby joq – Úkimet basshysy

ASTANA. KAZINFORM – Úkimet basshysy Oljas Bektenov Densaýlyq saqtaý mınıstrliginiń aýdandyq aýrýhanalardy kúrdeli jóndeý jumystarynyń áli bastalmaǵanyn jáne tıisti jabdyqtarmen qamtylmaǵanyn aıtty.

«Qazir 239 obektiniń jobalyq qujattamasy daıyn, onyń 109-y boıynsha ǵana merdiger kompanııalar aıqyndaldy. Qalǵandary ázirge naqty isten góri, jalań sóz kúıinde qalyp otyr. Al, qurylys jumystaryn aldaǵy naýryz-sáýir aılarynda bastaý qajet. Densaýlyq saqtaý mınıstrligi bolsa, olardy qarjylandyrý úshin bıýdjettik ótinimderdi berýge asyǵar emes. Ákimdikter de qarjylandyrý máselelerin sheshe almaı keledi», - dedi Oljas Bektenov Úkimet otyrysynda. 

Sondaı-aq, Premer-Mınıstr áli kúnge deıin kóp beıindi ortalyq aýdandyq aýrýhanalardy kúrdeli jóndeý jumystarynyń bastalmaǵanyn aıtty. 

«Aýrýhanalardy medıtsınalyq jabdyqtar satyp alý boıynsha da jaǵdaı máz emes. Mundaı protsedýralar kóp ýaqyt alady. Mınıstrlik olardyń esep-qısabyn júrgizgen de joq», - deıdi ol.