Aýdandardaǵy onkologtardyń biliktilikteri jetildiriledi
ASTANA. 8 qyrkúıek. QazAqparat - Onkologııalyq kómekti damytý baǵdarlamasynyń aıasynda aýdandardaǵy onkologtardyń biliktilikterin jetildirý jumystary qolǵa alyndy,
dep habarlady Qazaqtyń onkologııa jáne radıologııa ǵylymı-zertteý ınstıtýty dırektorynyń ǵylym jónindegi orynbasary Sýrııa Esentaeva pm.kz saıtyna bergen suhbatynda.
«Almaty memlekettik dárigerlerdiń biliktiligin jetildirý ınstıtýty men Qazaqtyń onkologııa jáne radıologııa ǵylymı-zertteý ınstıtýtynyń bazasynda barlyq medıtsınalyq járdem deńgeıindegi dárigerlerdi oqytý jáne olardyń biliktilikterin jetildirý jumystary júrgizilip jatyr», - dedi Sýrııa Esentaeva.
Mamannyń aıtýynsha, birinshi kezekte alǵashqy medıtsınalyq-sanıtarlyq járdem qyzmetiniń dárigerleri oqytylýda. Jaqyn arada arnaıy baǵdarlamalar boıynsha barlyq aýdandyq onkologtardy oqytý josparlanyp otyr. Elimizdiń barlyq aýdandarynda búginde 263 onkolog jumys isteıdi.
Oǵan qosa, Qazaqtyń onkologııa jáne radıologııa ǵylymı-zertteý ınstıtýtynyń bazasynda ambýlatorlyq deńgeıdegi onkolog mamandardyń biliktilik deńgeıleri jetildirýde, búginde bul jerden 86 maman oqyp shyqty. Elimizdiń barlyq óńirlerinen kelgen ol mamandar endi óz bilimderin aýdandyq jáne aýyldyq onkologtarǵa úırenetin bolady.
«Qazirgi isiktiń zamanaýı dıagnostıkasy, genetıkalyq, gıstologııalyq jáne molekýlıarlyq zertteýler qashan da úlken mańyzǵa ıe. Biz barlyq oblystyń gıstolog-mamandaryn oqytý jónindegi oqý baǵdarlamalaryn ázirledik, oǵan qosa arnaıy baǵdarlama boıynsha 25 radıolog mamandy oqytyp shyqtyq», - dep túıindedi óz sózin S.Esentaeva.
Esterińizge sala keteıik, elimizde Onkologııalyq kómekti damytýdyń 2012-2016 jyldarǵa arnalǵan baǵdarlamasy qolǵa alynyp otyr.
