Aýdandar men aýyldardaǵy kópbalaly otbasylarǵa baspana qalaı beriledi

NUR-SULTAN. QazAqparat - QR Parlament Májilisiniń jalpy otyrysynda aýdan ortalyqtary men aýyldarda kópbalaly otbasylarǵa baspana salý máselesi kóterildi, dep habarlaıdy QazAqparat tilshisi.

«Búginde baspana negizinen oblys ortalyqtarynda jáne iri qalalarda salynýda. Al aýdan ortalyqtarynda, onyń ishinde aýdandyq mańyzdaǵy qalalarda jańa úılerdiń qurylysy joqtyń qasy. Ókiletti organdardyń málimetinshe, baspanaǵa muqtaj 31725 kópbalaly otbasynyń arasynda 9461-i nemese 30 paıyzy aýdan ortalyqtarynda nemese aýyldy jerlerde turady. Osy oraıda bul másele qalaı sheshiledi?», - dep surady depýtat Quralaı Qaraken.

Óz kezeginde QR Indýstrııa jáne ınfraqurylymdyq damý vıtse-mınıstri Qaıyrbek Óskenbaev 2019 jyldyń bıýdjetinde qarastyrylǵan 50 mlrd teńgeniń 27,5 mlrd teńgesi jańa turǵyn úıdi salýǵa qarastyrylǵanyn jetkizdi.

«22,5 mlrd teńge baspana alýǵa baǵyttalady, onyń ishinde kópbalaly analar turyp jatqan aýdan ortalyqtary men aýyldar qamtylǵan. Biz ákimdikterge qurylysqa jáne baspanany satyp alýǵa qarjyny bólemiz. Olar konkýrs jarııalap, kezekte turǵandar úshin qajetti páterlerdi alady», - dep túsindirdi Q. Óskenbaev.

Osy turǵyda Parlament Májilisiniń tóraǵasy Nurlan Nyǵmatýlın aýyldy jerlerde satyp alýǵa bolatyn úılerdiń joq ekenin atap ótti.

«Qaıyrbek Aıtbaıuly, aýyldarǵa baryp júrsiz ǵoı. Qazir aýylda qaıbir daıyn úı bar? Aýylda turǵyn úı salýǵa daıyn qurylys kompanııalary bar ma? Ol jerlerde daıyn baspana joq. Atalyp ótkendeı, baspanaǵa muqtaj kópbalaly otbasylardyń 30 paıyzy aýyldyq aýmaqtarda turyp jatyr», - dedi Májilis tóraǵasy.

Bul rette Qaıyrbek Óskenbaev aýdan ortalyqtarynda az qabatty úıler salynatynyn atap ótti.

«Aýdan ortalyqtarynda kópqabatty záýlim úılerdi salmaımyz. Biz 4-5 aıda salynatyn az qabatty turǵyn úılerdi turǵyzamyz. Sondyqtan da bıyl jergilikti atqarýshy organdarda osyndaı úılerdi salýǵa ýaqyt jetkilikti bolady. Tıptik jobalardy daıyndadyq, olardyń barlyǵy saraptamadan ótti», - dedi vıtse-mınıstr.

Budan buryn habarlanǵandaı, jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn maquldady. https://kaz.inform.kz/news/kopbalaly-otbasylarga-birinshi-kezekte-pater-alu-kukygy-beriledi_a3520139

Onyń aıasynda «Altyn alqa», «Kúmis alqa» alǵandar nemese buryn «Batyr ana», sondaı-aq birinshi jáne ekinshi dárejeli «Ana dańqy» ataǵyn alǵan kópbalaly analar men kópbalaly otbasylar sanaty úshin turǵyn úı alýǵa jeke kezek engizý qarastyrylǵan.