Aýdanda turatyn sazger Astanada ótken kompozıtorlar baıqaýynan júldeli oraldy - Qyzylorda
QYZYLORDA. QazAqparat - Qazaqstan Respýblıkasy Táýelsizdiginiń 25 jyldyq mereıtoıyna baılanysty QR Mádenıet jáne sport mınıstrliginiń uıymdastyrýymen ótkizilgen baıqaýda qazalylyq Sáýken Álish laýreat atanyp, júldeli ІІІ oryn ıelendi, - dep habarlady QazAqparat HAA tilshisi oblystyq mádenıet basqarmasyna silteme jasap.
Merekege oraı uıymdastyrylǵan saltanatty marapat Astanadaǵy «Kongress-Holl» saraıynda ótkizildi. 2011 jyly da Sáýken Álish horǵa arnalǵan «Týǵan elim - Qazaqstan» atty shyǵarmasymen júldeger atanǵan bolatyn. Eki júlde de S.Álishtiń hor jáne orkestrge daıyndaǵan shyǵarmalary úshin berilip otyr.
Konkýrsta basty júldeni Almatydaǵy qazaq ulttyq konservatorııasynyń professory, QR Eńbek sińirgen qaıratkeri Beıbit Dáldenbaı «Jeltoqsan» atty sımfonııasymen ıelense, ekinshi júlde osy atalǵan oqý ornynyń oqytýshysy, professor, kompozıtor-sımfonıst Vladımır Strıgotskııge sımfonııalyq poemasy úshin berildi. Al úshinshi júlde alǵan Sáýken Álishtiń halyq aspaptary orkestrine arnalǵan tarıhı shyǵarmasy «Uly dala qypshaqtary» dep ataldy.
