Aýdan jáne qala ákimi laýazymyna kimder kandıdat bola alady

Ortalyq saılaý komıssııasynyń múshesi Shavkat Ótemisov aýdan jáne oblystyq mańyzy bar qala ákimi laýazymyna kimder kandıdat bola alatynyn aıtty, dep habarlaıdy QazAqparat tilshisi.

«Aýdannyń, oblystyq mańyzy bar qalanyń ákimi bolyp saılanýy úshin QR azamaty Qazaqstan Konstıtýtsııasynda, «QR-daǵy Saılaý týraly» Konstıtýtsııalyq zańynda, QR-daǵy jergilikti memlekettik basqarý jáne ózin-ózi basqarý týraly zańda jáne QR memlekettik qyzmet salasyndaǵy zańnamasynda belgilengen talaptarǵa sáıkes kelýi tıis. Konstıtýtsııalyq zańnyń 113-2-babyna sáıkes, QR-nyń memlekettik qyzmet salasyndaǵy zańnamasynyń talaptaryna sáıkestigin tekserý úshin ákimge kandıdat tıisti aýmaqtyq saılaý komıssııasyna tizbesi QR Memlekettik qyzmet isteri agenttigi tóraǵasynyń buıryǵymen jáne Ortalyq saılaý komıssııasynyń qaýlysymen belgilengen qujattardy usynady. Olar: QR azamatynyń jeke basyn kýálandyratyn qujat kóshirmesi, aýdannyń, oblystyq mańyzy bar qalanyń ákimi kandıdatynyń qyzmet tizimi, eńbek qyzmetin rastaıtyn qujattardyń kóshirmesi, bilimi týraly qujattar men olardyń qosymshalarynyń kóshirmeleri. Sonymen qatar zańnamaǵa sáıkes, ákimdi tısti ákimshilik aýmaqtyq birliktiń halqy jalpyǵa birdeı teń, tóte saılaý quqyǵy negizinde jasyryn daýys berý arqyly 25 jasqa tolǵan QR azamattarynyń qatarynan laýazymǵa saılaıdy», - dedi Shavkat Ótemisov Ortalyq saılaý komıssııasynyń otyrysynda.

Onyń atap ótýinshe, Konstıtýtsııaǵa sáıkes, sot is-áreketke qabiletsiz dep tanyǵan, sondaı-aq sot úkimi boıynsha bas bostandyǵynan aıyrý oryndarynda otyrǵan azamattardyń saılanýǵa qatysý quqyǵy joq.

«Bul Konstıtýtsııanyń 33-baby 3-tarmaǵynda kózdelgen. «Saılaý týraly» Konstıtýtsııalyq zańǵa sáıkes, sottalǵany zańdy belgilengen tártippen ótelmegen nemese alynyp tastalmaǵan adam, sonymen qatar sybaılas jemqorlyq qylmys pen sybaılas jemqorlyq quqyq buzýshylyq jasaýdaǵy kinási zańda belgilengen tártippen tanylǵan adam kandıdat bola almaıdy. Kandıdat memlekettik qyzmet týraly zańnyń talaptaryna saı kelýi tıis. Óıtkeni, ákimniń laýazymy memlekettik qyzmetshiler sanatyna jatady», - dedi komıssııa múshesi.