Aýdan ákimderin saılaýǵa BQO dombyrashylary belsendi qatysty
Búgin Aq Jaıyq óńirindegi Qaratóbe, Tasqala jáne Bókeı Ordasy aýdandarynyń turǵyndary saıası naýqanǵa belsene qatysyp jatyr. Olar jergilikti ýaqytpen tańǵy 7.00-den bastap saılaý ýchaskelerine aǵyla bastady, dep habarlaıdy Kazinform.
Turǵyndardyń keıbiri eldegi eleýli sátti erekshe is-sharalarmen aıshyqtap, kópshilikke kóterińki kóńil-kúı syılady. Mysaly, Qaratóbe aýdanyndaǵy №278 saılaý ýchaskesinde «Asyl ájeler» ansambli ulttyq naqyshta kıinip, dástúrli ánder shyrqady.
«Aýdan ákimin saılaý múmkindigi halyqtyń tańdaýyna berilip otyr. Bul, árıne, durys. Endi jergilikti turǵyndar birlese sheshim qabyldaı alamyz. Bizdiń ansambl quramyndaǵy ájelerdiń bári daýys berdi. Biz saıası naýqanǵa beı-jaı qaramaımyz. Sondyqtan jerlesterimizdi saılaýǵa bir kisideı atsalysýǵa shaqyramyn», - deıdi ansambl jetekshisi Gúlsara Ǵabdıqyzy.
Al Tasqala aýdanynyń ortalyǵynda dombyrashylar da saılaýdy merekege aınaldyrdy. Olar kıeli aspappen tól mýzykalardy oryndap, saıası naýqannyń sánin keltirdi. Mánshúk Sámıeva balalar mýzyka mektebinde sabaq beredi. Ol óz ujymymen birge osy bastamaǵa uıytqy bolǵan.
«Bizdiń shyǵarmashylyq ujymda 8 adam jumys isteıdi. Bárimiz bir aýyzdan saılaý kúni óner kórsetýdi uıǵardyq. Ulttyq óner árkez ulyqtalýy tıis. Osyndaı kóńil-kúımen tasqalalyqtar saılaýǵa belsene qatysyp jatyr», - deıdi ol.
Úsh aýdanda barlyǵy 63 saılaý ýchaskesi jumys istep tur. Olarda 28 884 saılaýshy tirkelgen.
«Jergilikti ýaqytpen 13.00-degi aqparat boıynsha, 10 myńnan astam adam daýys berip úlgerdi. Saılaý ýchaskelerinde qoǵamdyq tártip buzý derekteri men zańǵa qaıshy áreketter tirkelgen joq», - dedi aýmaqtyq saılaý komıssııasynyń tóraǵasy Ǵaısa Qapaqov.
Elimizde Prezıdent tapsyrmasyna baılanysty saılaý júıesine kóptegen jańashyldyq engizildi. Ár saıası jańǵyrý memleketti basqarý isinde halyqtyń róli men mańyzyn arttyrýdy kózdeıdi. Sońǵy eki jylda birqatar ózgeris jasaldy. Atap aıtqanda, partııalardyń Májiliske ótý shegi 5 paıyzǵa deıin tómendedi. Saılaý bıýlletenderine «bárine qarsymyn» baǵany qosyldy. Endi, mine, alǵash ret aýdan ákimderin saılaý naýqany ótip jatyr. Bul – demokratııaǵa degen úlken qadam.
