Aýdan ákimderin saılaý ýaqytsha toqtatyla ma – OSK jaýaby

ASTANA. KAZINFORM – Ortalyq saılaý komıssııasynyń tóraǵasy Nurlan Ábdirov Májilis depýtattarynyń aýdan ákimderin saılaýdy ýaqytsha toqtatý týraly depýtattyq saýalyna jaýap berdi.

- «Qazaqstan Respýblıkasyndaǵy jergilikti memlekettik basqarý jáne ózinózi basqarý týraly» Zańynyń 32-babyna sáıkes, aýdan (oblystyq mańyzy bar qala) ákimi «Qazaqstan Respýblıkasyndaǵy saılaý týraly» Konstıtýtsııalyq zańǵa sáıkes laýazymǵa saılanady. «Qazaqstan Respýblıkasyndaǵy saılaý týraly» Konstıtýtsııalyq zańynyń (budan ári – Konstıtýtsııalyq zań) 13-1-taraýymen ákimderdi saılaýǵa daıyndyq jáne ony ótkizý kezinde týyndaıtyn qatynastar reglamenttelgen. 2023 jyly 5 qarashada pılottyq túrde saılanǵan 42 aýdan men 3 oblystyq mańyzy bar qala ákimderiniń ishinen ókilettikterin merziminen buryn toqtatqan 3 ákim bar, - dedi OSK tóraǵasy.

Onyń dereginshe, olar myna aýdan ákimderi:

- Qaraǵandy oblysynyń Aqtoǵaı aýdany (Úkimet Apparatyna aýysýyna baılanysty);

- Qyzylorda oblysynyń Shıeli aýdany (Qyzylorda qalasynyń ákimi bolyp taǵaıyndalýyna baılanysty);

- Jetisý oblysy Kerbulaq aýdany (Almaty oblysy ákiminiń birinshi orynbasary bolyp taǵaıyndalýyna baılanysty).

- Qoldanystaǵy zańnamaǵa sáıkes 2025 jyldyń basynan bastap 2 qala, 6 aýdan ákimderiniń saılaýy ótti jáne 2 aýdan ákiminiń saılaýy taǵaıyndaldy. Óz kezeginde, saýalda kóterilip otyrǵan aýdan ákimderin saılaýdy ýaqytsha toqtatý jáne saıası moratorıı engizý máseleleri OSK quzyretine kirmeıdi. Sebebi atalǵan máselelerdi iske asyrý Konstıtýtsııalyq zańǵa jáne «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańǵa túzetýler engizýdi qajet etedi, - dedi Nurlan Ábdirov.

Buǵan deıin Májilis depýtattary aýdan ákimderin máslıhat arqyly saılaýdy usynǵanyn jazǵan edik.