Aýdan ákimderi úshin kásipkerlikti damytý boıynsha jeke KPI bekitken jón — Erlan Qoshanov
ASTANA. KAZINFORM — Jergilikti atqarý organdary deńgeıinde shaǵyn jáne orta bıznesti damytý mindeti kóbinese «kómeski» kúıinde qalyp otyr. Bul týraly búgin Májilistiń jalpy otyrysynda Palata spıkeri Erlan Qoshanov aıtty.
— Bıyl osymen ekinshi ret Joǵary aýdıtorlyq palatanyń esebin tyńdap otyrmyz. Birinshi jartyjyldyqta dári-dármekpen qamtamasyz etý jaıyn keńinen talqylaǵan edik. Búgin qaralyp jatqan máseleniń de — kásipkerlikti qoldaý sharalarynyń da mańyzy zor. Jalpy, elimizde osy baǵyttaǵy aýqymdy sharalar uzaq jyldan beri júzege asyp keledi. Memleket basshysynyń naqty tapsyrmalary bar. Bıýdjetten qyrýar qarjy jumsalyp jatyr. Sońǵy bes jylda kásipkerlerge 4,5 trıllıon teńge bólingen. Sol qarajat qalaı jumsalyp jatyr, onyń tıimdiligi men qaıtarymy, kásipkerliktiń odan ári damýyna áseri qandaı? Ekonomıkalyq ósimdi qamtamasyz etýge qanshalyqty yqpal etti? Osy suraqtardyń jaýabyn búgin birlesip qarastyryp kórdik. Bul máseleler Joǵary aýdıtorlyq palatanyń esebinde de qamtylǵan, — dedi Májilis spıkeri.
Osy oraıda Erlan Qoshanov Úkimet pen jergilikti atqarýshy organdar nazar aýdarýǵa tıis keıbir jaıttarǵa toqtaldy.
— Birinshi. Búgingi esep kórsetkendeı, qoldanystaǵy quraldardyń kóbi alǵa qoıǵan mindetterdi tolyq kólemde oryndaı almaı otyr. Osyǵan baılanysty búkil qoldaý sharalaryna keshendi revızııa júrgizý qajet. Bul máselege formaldy túrde qarap, tek qoldaý sharalarynyń tizilimin jasaýmen ǵana shektelmegen jón. Olardyń tıimdiligine tereń taldaý júrgizý kerek. Bul jumysta kózdelgen sharalardyń sanyna emes, naqty ekonomıkaǵa qalaı áser etetinine basymdyq berilýge tıis, — dedi ol.
Palata tóraǵasy ekinshiden, kásipkerlikti qoldaý úshin biryńǵaı, ortalyqtandyrylǵan saıasat qajet ekenin aıtty.
— Ol týraly búgin kóp aıtyldy. Syn da boldy. Qoldaý kórsetý júıesi «bir tereze» qaǵıdaty boıynsha jumys istep, kásipkerlerdiń biryńǵaı tsıfrlyq kabınetine aınalýy qajet. Memleket basshysynyń ózi «mundaı ahýal kásipkerlerdi shatastyratyny» týraly aıtqan bolatyn. Sonymen qatar, qoldaý sharalary salalyq jáne aımaqtyq erekshelikterdi de eskerýge tıis. Ol bárine birdeı emes, ár salaǵa, naqty maqsatqa baǵyttalǵan sharalar bolýy kerek. Mysaly, aýyl sharýashylyǵymen aınalysatyn kásipkerdiń kólik jáne logıstıka salasyndaǵy kompanııaǵa qoıylatyn krıterıılerge saı kelmeıtini anyq. Budan bólek, atalǵan biryńǵaı tsıfrlyq tereze bir kásiporynnyń birneshe ret qoldaý sharasyn alýyna tosqaýyl qoıady. Búgingi esepten biz birqatar kásiporynnyń on jyl boıy túrli qoldaý sharalaryn alǵanyn kórip otyrmyz. Qaıtalama kómek tek óndiristi keńeıtetin nemese jańa tehnologııalardy engizetin kompanııalarǵa ǵana kórsetilýi kerek. Túpki maqsatymyz bir — memleket resýrs usynady, bıznes ekonomıkalyq ósimdi qamtamasyz etedi. Al tsıfrlandyrý osy júıeni ashyq ári tıimdi qurýǵa kómektesedi, — dedi Erlan Qoshanov.
Májilis tóraǵasy úshinshiden, ınstıtýtsıonaldyq jaýapkershiliktiń tómendigine toqtaldy.
— Búginde jergilikti atqarý organdary deńgeıinde shaǵyn jáne orta bıznesti damytý mindeti kóbinese «kómeski» kúıinde qalyp otyr. Ákimderdiń qyzmetine Jalpy óńirlik ónim men tartylǵan ınvestıtsııa kólemine qarap baǵa berilip otyr. Al olar negizinen iri kásiporyndar esebinen qalyptasady. Bul rette, shaǵyn jáne orta bıznesten túsetin salyq túsimderiniń bir bóligi jergilikti deńgeıge berilgenin eskersek, kásipkerliktiń damýyn qamtamasyz etýdegi ákimderdiń jaýapkershiligi de artýǵa tıis. Osyǵan baılanysty oblystyq qana emes, aýdan deńgeıinde de ákimdikter úshin kásipkerlikti damytý boıynsha jeke KPI bekitken jón, — dedi ol.
Erlan Qoshanov áleýmettik-kásipkerlik korporatsııanyń qyzmetine qatysty biraz syn aıtylǵanyna nazar aýdartty.
— Memleket basshysy Joldaýynda dál osy áleýmettik-kásipkerlik korporatsııalar aımaqtardyń ekonomıkalyq ósimin arttyratyn qozǵaýshy kúshke aınalýǵa tıis ekenin aıtqan bolatyn. Sonymen qatar, Prezıdent aýyldyq aımaqtardy damytýda ÁKK-lardyń áleýetin barynsha paıdalanýdy tapsyrdy. Osy oraıda, depýtattar Úkimetpen birlesip, áleýmettik-kásipkerlik korporatsııalar qyzmetiniń tıimdiligin jáne bıznesti damytýdaǵy rólin arttyrýǵa baǵyttalǵan zańnamalyq retteý sharalaryn qarastyrǵany jón bolar edi, — dedi Májilis tóraǵasy.
Palata spıkeri tórtinshiden, Memleket basshysy bıylǵy Joldaýynda qoldanystaǵy zańnamany kásipkerler suranysyna beıimdeý mindetin qoıǵanyn aıtty. Depýtattar Úkimetpen birge osy baǵyttaǵy zańnamany bıznestiń qajettigine qaraı beıimdeýdi der kezinde qamtamasyz etýi tıistigin atap ótti.
— Osy rette, qazirgi ekonomıkalyq ózgeristerdi eskere otyryp, keıbir zańdardy, mysaly, Bıznes júrgizý máselesi týraly zańnyń jáne Kásipkerlik kodekstiń jekelegen normalaryn jańartý qajet bolar. Onyń ishinde kásipkerliktiń tıimdi damýyna kedergi keltiretin erejeler, tosqaýyldar men ákimshilik júktemeler bolýy múmkin. Memleket basshysy bizdiń aldymyzǵa naqty mindet qoıdy. Ol — jeke kásipkerlikti qoldaýdy ekonomıkalyq ósimniń draıverine aınaldyrý. Osy rette, memlekettik qoldaý jumys oryndaryn quryp, kásipkerlerge jańa múmkindikter ashyp, otandyq óndiristi nyǵaıtýǵa yqpal etýi kerek. Búgingi Joǵary aýdıtorlyq palatanyń usynymdary men depýtattar aıtqan barlyq usynysty Úkimet nazarǵa alýǵa tıis. Biz osy máselege áli de qaıtyp oralamyz. Bul suraq turaqty baqylaýymyzdy bolady, — dedi Erlan Qoshanov.
Aıta keteıik, Májilistiń jalpy otyrysynda depýtattar Joǵary aýdıtorlyq palatanyń jeke kásipkerlerge memlekettik qoldaý sharalarynyń tıimdiligine qatysty esebin tyńdady. Otyrys barysynda Joǵary aýdıtorlyq palatanyń tóraǵasy Álıhan Smaıylov bıznesti qoldaý tetikteriniń kemshiligin atady.