Aýdan ákiminiń orynbasary memleketke 6,5 mln teńge shyǵyn keltirgen bolýy múmkin

NUR-SULTAN. QazAqparat - Aýdan ákiminiń orynbasary men aýyldyq okrýg ákimi laýazymdyq ókilettikterin asyra paıdalanǵan. Bul týraly QR Sybaılas jemqorlyqqa qarsy is-qımyl agenttigi 1-shi departamenttiń asa mańyzdy ister jónindegi tergeýshisi Qaısar Barjaqsynov aıtty, dep habarlaıdy QazAqparat tilshisi.

«Soltústik Qazaqstan oblystyq sybaılas jemqorlyqqa qarsy qyzmeti SQO Esil aýdany ákiminiń orynbasary men aýyldyq okrýg ákimine qatysty laýazymdyq ókilettikterin asyra paıdalaný faktisi boıynsha sotqa deıingi tergeý bastady. Olar 2020 jyldyń mamyr aıynan bastap maýsym aıyna deıingi aralyqta jeke menshik uıymdy tartý arqyly aýyldyq okrýg ákimdiginiń balansynda turǵan burynǵy mekemeniń metall qurylǵysyn zańsyz buzý jáne satý arqyly memleketke 2,5 mln teńge kóleminde materıaldyq shyǵyn keltirý kúdigine ilindi», - dedi tergeýshi.

Onyń atap ótýinshe, joǵaryda atalǵan ákimniń orynbasary sýmen qamtamasyz etý júıesiniń jóndeý jumystaryna bólingen bıýdjet qarajatyna jeke menshigine júk avtokóligin satyp alý arqyly memleketke 4 mln teńge somasynda materıaldyq shyǵyn keltirý kúdigine de iligip otyr.

«QR QPK 201-babyna sáıkes ózge aqparat tergeý múddesi úshin jarııalaýǵa jatpaıdy», - dedi Qaısar Barjaqsynov.