Aýdan ákimi parany rýblmen alǵan

ASTANA. QazAqparat -  Soltústik Qazaqstan oblysyna qarasty Mamlıýt aýdanynyń ákimi para alǵany úshin ustaldy.  Bul týraly búgin Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Nurlan Jahın málim etti, dep habarlaıdy QazAqparat tilshisi.

«Soltústik Qazaqstan oblysynda aýdan ákiminiń qylmysy áshkere boldy. 1 qyrkúıek kúni Soltústik Qazaqstan oblystyq sybaılas jemqorlyqqa qarsy ulttyq bıýrosymen júrgizilgen jedel izdestirý sharasy barysynda Mamlıýt aýdany ákiminiń paraqorlyq áreketi áshkerelendi. Ákim jalpy qamqorlyǵy úshin  JShS dırektorynan 185 myń reseı rýbli somasynda aqshany para retinde alǵan. Teńgege shaqqanda 1 mln teńgeni quraıdy», - dedi resmı ókil.

Onyń aıtýynsha, ákim ustalǵan ýaqytta kinásin tolyqtaı moıyndady. Sondyqtan qamaýǵa alynǵan joq.

«Paraǵa  alǵan aqsha onyń kabınetinen tabylǵan bolatyn», -dedi Nurlan Jahın.