Aýdan ákimi orynbasarynyń ústinen sotqa deıingi tergeý júrip jatyr

NUR-SULTAN. QazAqparat - Qostanaı oblysynyń Fedorov aýdany ákiminiń orynbasaryna qatysty sotqa deıingi tergeý júrip jatyr. Bul týraly búgin QR Memlekettik qyzmet isteri jáne sybaılas jemqorlyqqa qarsy is-qımyl agenttigi Qoǵammen baılanys departamentiniń dırektory Arman Berdalın aıtty, dep habarlaıdy QazAqparat tilshisi.

«Sybaılas jemqorlyqqa qarsy is-qımyl ulttyq bıýrosynyń Qostanaı oblystyq departamenti oblystyń Fedorov aýdany ákiminiń orynbasaryna qatysty sotqa deıingi tergeý júrgizip jatyr», - dedi ol.

Departament basshysynyń aıtýyna qaraǵanda, ol aýdannyń avtojoldaryn kútip ustaý jáne qyzmet kórsetý sharty boıynsha oryndalǵan jumys aktisine qol qoıý jáne tólem jasaý úshin JShS ókilinen 150 myń teńge somasynda para alǵan.

«Kinásin tolyq moıyndaýyna baılanysty protsestik ustaý qoldanylǵan joq. Kúdikti sotqa deıingi jeńildetilgen is júrgizý týraly málimdedi. Tergeý jalǵasyp jatyr», - dedi Arman Berdalın.