Aýdan ákimi ardagerlerdi quttyqtady

ALMATY. 9 mamyr. QazAqparat /Erbol Azanbek/ - Jeńis kúni qarsańynda Almatynyń Áýezov aýdanynyń ákimi Bekqalı Torǵaev Uly Otan soǵysynyń ardagerleri Ámen Haıdarov, Nıkolaı Lıah, Mıhaıl Lohmanovtardyń úılerinde bolyp, quttyqtady.

«Sizder kóptegen qıyndyqtar men kedergilerdi jeńe otyryp, ómir belesterin abyroımen baǵyndyrdyńyzdar. Otan basyna qıyn kún týǵanda qolǵa qarý alyp, qorǵadyńyzdar. Uzaq ta, qıyn áskerı joldy basyp ótip, soǵys órtinen kúlge aınalǵan Otanymyzdy qalpyna keltirýge atsalystyńyzdar. Sizderdiń aýyr ómir joldaryńyz erekshe qurmetke ıe. Biz sizderdiń eren eńbekterińizdiń arqasynda qazir tynyshtyq pen tatý ómir súrýdemiz. Biz ótkenimizben jáne sizdermen maqtanamyz. Sizderdiń otbasylaryńyzǵa tatýlyq pen baılyq . ózderińizge densaýlyq pen uzaq ǵumyr tileımin», - dedi aýdan ákimi ardagerlerdi quttyqtap turyp.

Ámen Haıdarov - belgili rejıser-anımator, sýretshi, stsenarıst. QazKSR ónerine eńbek sińirgen qaıratker, Memlekettik syılyqtyń laýreaty. Qazaq mýltıplıkatsııa óneriniń negizin salýshy. 1942 jyldan bastap Harkov túbindegi 57 mınomet polkinde soǵysqa aralasqan. Stalıngrad maıdanynyń qatysýshysy. ІІ dárejeli «Uly Otan soǵysy» ordeniniń, «Stalıngradty qorǵaǵany úshin» medaliniń ıegeri.

N.Lıah - gvardııa polkovnıgi. 1942 jyly Máskeý túbinde NKVD-ǵa qarasty polkte vzvod komandıri retinde soǵysqa aralasqan. Klın, Kalının qalalaryn azat etýge atsalysqan. Mıhaıl Lohmanov - Ýkraına maıdanynyń ardageri. Qos birdeı «Uly Otan soǵysy», «Qyzyl juldyz» ordenderiniń, «Áskerı erligi úshin», «Pragany azat etkeni úshin», «Berlındi azat etkeni úshin» medaldarynyń ıegeri.

Ardagerler aýdan ákimine quttyqtaý úshin úlken alǵys bildirip, barlyq qazaqstandyqtarǵa myqty densaýlyq, tabystar men ashyq aspan tiledi. «Beıbitshilik - eń basty nárse», - deıdi UOS ardagerleri.