Aýdan ákimderiniń esebi: Astanalyqtar qandaı máseleler kóterdi

NUR-SULTAN. QazAqparat – Elorda aýdandarynyń ákimderi qala turǵyndarymen 15 esep berý kezdesýin ótkizdi. Bul týraly Nur-Sultan basshysy Altaı Kólginov Instagram-paraqshasynda jazdy, dep habarlaıdy QazAqparat.

«Árqaısysyna onlaın jáne oflaın rejıminde qatystym. Qala turǵyndarynyń suraqtarynyń bir bóligi sheshimin tapty», - dedi A.Kólginov.

Atap aıtqanda, Baıqońyr aýdanynyń turǵyndary №8 emhanaǵa qatysty máseleni kóterdi. Nátıjesinde Nur-Sultan ákimi medıtsınalyq mekemege kúrdeli jóndeý júrgizýdi tapsyrdy. Sondaı-aq, qala turǵyndarynyń ótinishi boıynsha №18 «Aıajan» balabaqshasyna kúrdeli jóndeý jasalatyn boldy. Al №87 orta mekteptiń elektrmen jabdyqtaý máselesi sheshiledi.
«Budan bólek, Úrker (Esil aýdany) eldi mekeniniń turǵyndary órt sóndirý deposyn ashý máselesimen júgindi. Jobalaý-smetalyq qujattamany ázirleýge kirisýdi, sodan keıin osy eldi mekende órt sóndirý bóliminiń qurylysyna kirisýdi tapsyrdym.
Sondaı-aq, Almaty jáne Saryarqa aýdandarynyń birqatar kóshesinde kóshe jaryǵy ornatyldy. Abattandyrý, jyly aıaldamalardy ornatý, asfalttaý, apatty eski úılerdi buzý, turǵyn úı keshenin jóndeý kestesine qalanyń barlyq aýdandarynyń mekenjaılary engizildi.
Kelip túsken suraqtar qysqa merzimdi, orta merzimdi jáne uzaq merzimdi bolyp bólindi. Kóterilgen máseleler jumys josparyna alyndy.
Ózimniń halyqqa esep berý kezdesýim 10 aqpanda onlaın rejıminde ótedi. Biz úshin qala turǵyndaryn qalany damytýǵa tartý, qala turǵyndarynyń ótinishterin jumys josparyna engizý óte mańyzdy», - dep jazdy Altaı Kólginov.