Áýbákirovtiń máıitin qala syrtyna aparǵan Aıym Meıirbaeva nege jazalanbady
ASTANA. QazAqparat -2016 jyldyń aqpanynda iz-túzsiz joǵalǵan Erasyl Áýbákirovtiń máıitin qala syrtyndaǵy qalyń qarǵa Aıan Meıirbaevtyń ápkesi - Aıym Meıirbaeva aparyp tastaǵan.
Aıym Meıirbaevaǵa avtokólik jýý ornyndaǵy eki adam kómektesken. Ázirge tergeý olardyń kim ekenin anyqtaı almady, al, Aıym Meıirbaeva bul áreketi úshin eshqandaı jazaǵa tartylmady, dep habarlaıdy QazAqparat.
Aıan Meıirbaevtyń ákesiniń advokaty Erlan Bekpolov Áýbákirovtiń denesin qala syrtyna aparyp tastaǵan Aıym Meıirbaevanyń jazadan qutylý sebebin túsindirdi.
«Túsindirip ótsem, Erasyl Áýbákirovtiń máıitin Aıan Meıirbaevtyń kóligine salǵan - Nurbek Ájimbaı. Al, Aıannyń apaıy Aıym Meıirbaeva kólikte máıit jatqanyn bilmeı, ony minip júre bergen. Kólikti avto jýý beketine aparǵan Aıym men mekemeniń eki qyzmetkeri máıitti sol jerde kórgen. Qylmystyq is materıaldarynda máıitti tabý sáti kórsetilgen», - dep habarlady Aıan Meıirbaevtyń ákesiniń advokaty.
«Aıym Meıirbaeva máıitti qala syrtyna shyǵarǵany ras. Biraq, ol da, otbasy músheleri de kólikte máıit jatqanyn bilmegen. Aıym Meıirbaeva jas qyz, Aıannyń basynan ótken oqıǵalar ony ábden qorqytqan. Sol sátte Aıan Meıirbaev kúdikti bolyp júrgen edi. Sondyqtan, Aıym Meıirbaevanyń áreketi tekserildi. Tergeýmen kelisimge kele otyryp, Aıym Meıirbaeva máıitti qaıda tastaǵanyn kórsetip berdi. «Aıym Meıirbaeva nege jaýapqa tartylmady?» degenge qatysty aıtar bolsam, osyndaı jaǵdaılarǵa baılanysty qylmystyq kodekste myndaı túsinik bar: qylmystyq kodekske súıensek, jaqyn týysy retinde osyndaı áreketterdi jasyrǵany, polıtsııaǵa habarlamaǵany úshin jaýapqa tartpaýǵa bolady degen túsinik bar», - dedi Meıirbaevtyń advokaty.
Meıirbaevtyń qorǵaýshysy aıtqandaı, Aıym Meıirbaeva máıitti ózi jalǵyz kótere almaıtyn edi. «Ol rasymen jalǵyz emes edi, oǵan kómektesken adamdar da bolǵan oqıǵadan beıhabar edi. Tergeý Aıym Meıirbaevaǵa kómektesken adamdardy anyqtaǵan joq, qazir olar izdestirilip jatyr», - dedi E.Bekpolov.
Eske sala keteıik, Astana Medıtsına ýnıversıtetiniń stýdenti Erasyl Áýbákirov aqpan aıynda aıaýsyz óltirilgen bolatyn. 10 aqpanda Astana qalalyq ІІD-niń qyzmetkerleri jedel-izdestirý sharalary barysynda E.Áýbákirovtiń máıitin qar astynan taýyp aldy. Adam óltirdi degen kúdikpen basynda tórt adam - Aıan Meıirbaev, Andreı Tıhonenko, Vıtalıı Sherstenev jáne Nurbek Ájimbaı ustalǵan edi. A.Meıirbaev qylmystyq iste eń basty kúdiktilerdiń biri bolǵan. Biraq keıin Aıan Meıirbaevqa qatysty qylmystyq qýdalaý toqtatyldy, 7 mamyrda Astana prokýrorynyń kelisimimen Aıan Meıirbaev bosatyldy.
Al 12 qazan kúni Astana qalasy qylmystyq ister boıynsha mamandandyrylǵan aýdanaralyq sotynyń sýdıasy Asxat Áshirbekov medıtsınalyq ýnıversıtettiń stýdenti Erasyl Áýbákirovtiń isi boıynsha sot úkimin shyǵardy.
Sot barysynda qylmys jasady degen kúdikpen jaýapqa tartylǵan Nurbek Ájimbaı, Vıtalıı Sherstenev pen Andreı Tıhonenkolarǵa 11-den 20 jylǵa deıin bas bostandyǵynan aıyrý jazasy kesildi.
